No.2261/2020-2020

Vawiin khan Champhai North bialtu MLA Dr. ZR Thiamsanga, Vice-Chairman, Health & Family Welfare Board & Chairman, Covid-19 Medical Operational Team nibawk chuan a bial chhung Indo-Myanmar ramri dep khaw hrang hrangte fangin Covid-19 dona kawnga hmalaknate, ei leh bar intodelh theihna tura tulte Official leh khawtlang hruaitute nen an sawiho a. Hnahlanah Police Out Post hmun tur a enpui bakah Vaikhawtlang Health Sub Centre sak mek pawh a hmunah a tlawh a. A bial chhunga damlo engemawzah amah rawntute a enfiaha, damdawite pein a chawh bawk a ni.

Champhai North bialtu MLA Dr. ZR Thiamsanga chuan hun chep tak kara a bial chhung Indo-Myanmar border khua a hmalaknate Official-te nen enfiaha kal an nih thu sawiin, khawtlang harsatnate district thuneitute nena tangruala a hmun ngeia en ani chuan hmasawnna a thlen ngei a beisei thu a sawi a. Ramri chu ven uluk ngai anih vangin tha thlah lova venghimtute inpekna  fakin, ramri depa awmte chu dan lo a mihring veivak leh ruihhlo tawlh turte veng chhunzawm zel turin a chah a. Hnahlan tlangdung khua leh ramte chu ram tha, ei leh bar leh ranvulh thlenga hmun rem leh duhawm anih avangin mipuite chu taimak chhuaha intodelh tum turin a fuih bawk.

Covid-19 Medical Operational Team Chairman chuan Quarantine Centre a Ni 14 khunghran hnua RT-PCR Negative tawhte chu In lama kar khat vel pawnchhuak lova fimkhur taka an awm chhunzawm hnuah chuan zalen takin an awm thei tawh  a ni, a ti a. ZMC-ah nikhatah  sample 800-900 thlenga test theih anih tawh avangin tun atanga reiloteah sample lak thawnte enfiah zawh vek hman anih dawn thu a sawi a. A bial chhunga ei leh bar thar theihna hmunhmate a chinchhuaka zirchianga intodelh mai bakah thawnchhuah theih tur thlenga ngaihtuahna sen mek anih thu a sawi bawk.

Heng khaw hrang hrang tlawhnaah hian VLTF ten ramri ven kawnga an hmalakna theuhte leh ei leh bar dinhmunte an report a. Official-te nen khawtlang tana hmalak theih dan turte, Covid-19 hnu lam thlenga harsatna awm lohna tura hmalak dan turte an ngaihtuah ho a ni. Heng a khaw tlawhahte hian tanpuina sumfai leh Covid-19 dona hmanruate a sem nghal a ni.

Bialtu MLA hian Sialkal Range Development Council (SRDC) sum hmanga sak mek Vaikhawtlang Health Sub Centre chu Official leh khawtlang hruaitute nen tlawhin, hmun ruat tawh sa chu nakin zel  thlir chunga a hmun thlak nise tih a ni a. Hnahlan khuaa Police Out Post dinna tura hmun ruat chhinte pawh Official leh khawtlang hruaitute nen an enho a, a tul anga bawhzui nise tih a ni bawk.

Covid-19 Medical Operational Team Chairman Dr. ZR Thiamsanga hi Bawrhsap Pi Maria C.T Zuali, SP Pu Rex Zarzoliana Vanchhawng, SDO Sadar Pu Lalnunfela Chawngthu, CMO Dr. R.Lianmawia, DIPRO Dr. Lallawmkima leh Medical Operational Team Member Dr.Zoramdinthara te'n an tawiawm a ni.