No.2262/2020-2020

Lunglei District mi leh sa state pawn atanga lo haw, government quarantine facility, community quarantine facility leh home quarantine-a khung hran mek zat chu vawiin chhun dar 12:00 thleng khan mi 491 a ni a. Hengte hi sawrkar Quarantine Centre/DCHC/CCC-ah mi 338, Community Quarantine (kohhran hall) ah mi 133 leh mahni ina inkhunghran (Home Quarantine) mi 20 an ni. Nimin leh vawiin khan Lunglei District-ah lo haw, quarantine centre-a luh belh an awm lo a ni.

Quarantine period hmang zo tawh, RT-PCR result chhuaka negative bawk te chu Quarantine Centre atanga chhuah phalna pek mek zel niin vawiin pawh khan Lunglei District Quarantine Centre hrang hrang atangin mi 44 an chhuak a. Heng Quarantine Centre-ah te hian thlahna programme hman niin Quarantine hun hmang zo ta te hi tawngtaina nena thlah an ni a. An room chhuahsan te Disinfection Team ten an kap thianghlim nghal vek a ni. Quarantine Centre thenkhatah hian inmates ten an pawisa neih ang ang thawh khawmin Quarantine Centre enkawltute hnenah lawmthu sawina sumfai an hlan bawk a ni. 

Quarantine Centre atanga chhuak te hi an chhuah atanga ni 7 chhung chu mahni uluk taka invawng (self-monitoring) tura chah niin  mask tha taka vuah, social distancing tha taka zawm leh kut silfai fo te bakah hriselna kawngah mahni theuh invawn uluk zui zel tur leh tuallaiah leng chhuak lo tur leh in lamah inleng kawm lo tura hriattir an ni.