2208/2022-2023

Champhai, the 6th October, 2022: Mizoram Youth Commission (MYC) Coaching Centre Champhaia class lak bultanna puala hun hman chu vawiin chawhnu dar 3:30 khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan a hmanpui.

Dr. ZR Thiamsanga chuan sawrkar hmalakna leh khawtlang tana thahnemngai taka thathawhtute hmalakna avanga MYC Coaching Centre Champhai ataka kalpui a ni chu lawmawm a tih thu a sawi a. Ramri dep Champhai District a awmte tana rualawhna a phuhruk ngei a beisei thu sawiin, Zirlaite chu Champhai mai bakah Mizoram leh India ram pum anga mi tangkai leh chhawrnahawm nih tum tura ngaihtuahna seng turin a fuih a. Rualelna chang hriaa an tum leh hmabakte tha taka hlen tum turin a chah a ni.

Coaching Centre tun aia changtlung, hmunhma tha zawk leh coaching course zau zawk kalpui theihna tur sawrkarin a ngaihven zui zel dawn thu a sawi a. Zirna tihhmasawn kawngah kan zavaia tanrual a tul a, zirna mai bakah nunkawng hrisel leh entawntlak zawh thei tura district mipuite inpuahchaha tanho a tul a ni, a ti a. Hmasawnna kawng zawh tur leh hmalakna lian zawk nei turin thiamna neih angaih thu sawiin, ei leh bar dehchhuah leh hmasawnna ruhrel siam kawngah zirna leh thiamna neih angai a, chumi tur chuan theihtawp kan chhuah a tul a ni, a ti a. Zirlaite chu mahni leh chhungkua mai nilo, khawtlang leh ram tana malsawmna leh chhawrtlak nih tum turin a chah a ni. 

He hun hi District Bawrhsap Pu James Lalrinchhana chuan kaihruaiin Coaching Centre kaltlanga hmalaknate uluk taka vil zui a nih tur thu leh, zirlaite pui theitu tur leh tuaihriamna tur angte a tul anga chhawpchhuah tum a nih thu a sawi a. Zirlai rilru pu tur leh nih tuma chiang turin a chah a. Zirlaite rilruah rualelna dik tuha mipuitlinga chhuah tura tanlak tum a nih thu leh class room tlawmte atanga ram leh hnam tana mi tangkai tak tak chherchhuah tum a nih thu a sawi a. Hmanraw mamawhte MLA hmalakna hnuaiah dah belh zel tum a nih thu a sawi bawk.

Pu Lalthanfela, Co-ordinator, MYC Coaching Centre Champhai hnen atangin Coaching Centre chanchin tlangpui ngaihthlak a ni a. Pi Esther Leihang SDC, Dr. Lallawmkima DIPRO leh Pu HS Vanlalfakzuala ten fuihna thu an sawi a. MZP Hqrs Champhai aiawhin Tv. Thangdeihmanga'n thu a sawi bawk.

MYC Coaching Centre Champhai hi kumin June ni 17 khan MYC Chairman Dr. Vanlalțanpuia'n a hawng a. Hemi hnu hian Faculty lak leh bungraw mamawh angte lei niin vawiin atang hian class lak tan a ni a. Thawktu 5, Co-ordinator 1, Faculty 3 leh MTS 1 an awm mek a. Class hi zing dar 6:30 atanga dar 8:45 thleng kal tur a ni a. General Studies, Mathematics leh English-te zirtir an ni dawn a. MYC Coaching Centre Champhaiah hian a bultan nan seat 30 a awm a, course 1 hi thla thum chhung awh tur a ni a, thla thum course zawh hian a thara admission tih zel tur a ni. Zirlaite hi MSSSB, SSC leh MPSC thleng hmachhawn tura puahchah tum an ni a, a bultan nan MSSSB leh SSC course-te kalpui niin, course thar ațangin MPSC course kalpui tum a ni.

MYC Coaching Centre Champhai atan hian Nursing School Building chhawng chung bera room 3 chu hman lailawk a ni.