2209/2022-2023
Lunglei the 6th October' 2022: Vawiin khan Lunglei Bawrhsap Pu Kulothungan A, IAS kaihhruaiin ama office chamberah Lunglei khawpui leh a chhehvel khaw thenkhat ah natna chikhat chikungunya (Thosi tial) seh atanga natna kai theih hmuhchhuah a ni a, hemi laka invendan leh hmalak dan tur ngaihtuahin meeting neih a ni.

Pu Kulothungan A chuan Lunglei khawpui chhung veng hrang hrang leh a chhehvel khaw thenkhat Sekhum leh Haulawng ah te Chikungunya vei hmuhchhuah a nih thu a sawi a. He natna laka lo invendan leh hmalak dan tur ngaihtuah a ngaih thu a sawi a, mipui te hnenah chikungunya chungchang puanzar kawngah hmala turin medical department te a sawm a ni.

Medical mithiam ten chikungunya hi Malaria pai thosi ang nilo thosi tial chhuna mi seh ching a nih thu an sawi a, chikungunya natna hmuhchhuahte awmna veng ah chuan thosi chu awm tura ngaih a ni a, chutiang thosi laka inven leh thosi inthlahpun theihna thil tih chhiatte chu invenna pawimawh a nih thu an sawi a. Chikungunya hi khawsik sang tak nei thut, taksa leh tihrawl na, chauh ngawih ngawihna, lu na, luakchhuak leh thak a lang chhuak a ni. Kumin chhungin Lunglei khawpui leh a chhehvel khua ah mi 77 en zingah mi 22 he natna vei hi hmuhchhuah a ni. He natna umbo tura hmalak mek a nih thu an sawi bawk.