3833/2022-2023

Khawzawl, the 14th March, 2023: Khawzawl District chhung Ngaizawl leh Neihdawn inkalpawhna kawng kilometre 5 a thui, Special Assistance to States for Capital Investment (SASCI) sum cheng nuai 90 senga laih tlang chu vawiin chawhnu dar 1 khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan a hawng.

Hawnna hun buatsaihah Health & Family Welfare Board Vice Chairman Dr. ZR Thiamsanga chuan Ngaizawl leh Neihdawn khaw inkalpawhna kawng tha leh a hnuk hnai zawk, khampang sang tak hnuaia sualchhuah a ni thei chu lawmawm a tih thu a sawi a. Kawng cheibawl leh thawmthat kawngah theihtawp chhuah chhunzawm zel tum a ni, a ti a. Kawng laih tlang a nih theih nana khaw pahnih khawtlang mipuite tawiawmna leh tanrualna fakawm a tih thu sawiin, kham pang sang leh chetlak remlo tak a ni tih hre chunga huaisen taka hmalatu leh kawng lai tlangtute chhuanawm a tih thu a sawi bawk a. Nakin zel atana kawng pawimawh leh chhawr tangkai tur a nih avangin a remchan dan ang zela cheibawl tum a nih thu a sawi a. JJM Additional Fund hnuaia kum 2023 chhunga tui thianghlim pekna tur khua thlan zingah Ngaizawl thlan tel a ni chu lawmawm a tih thu a sawi bawk.

Ngaizawl leh Neihdawn khuate chu khaw taima tak an nih thu pawh sawiin, buh leh thlai a intodelh mai bakah hriselna leh hmasawnna rahbi hrang hrang chhawpchhuah kawngah Sawrkarin theihtawp a chhuah zel dawn thu a sawi a. Covid-19 hrileng leh harsatna dangte avanga hun khirh tak paltlang a nih dante leh health care scheme atana Sawkar hmalaknate a tarlang bawk a. Sawrkar flagship programme SEDP first phase second installment pekchhuah thuai tum a nih thu leh, second phase Rs. 50,000/- zela pek chhuah tum a nih thu sawiin, hamthatna dawngtute chu a nihna tur ang taka hmanga chhawr tangkai turin a chah a. Hun harsa tawh laiin Sawrkarin mipuite nitin khawsak kawnga mamawhte theihtawp chhuaha a ngaihtuah sak zel thu a sawi a. Mipuite chu khawtlang leh ram hmasawnna siam kawnga theihtawp chhuah puiah a sawm nghal bawk.

Thusawitu dang Pi Jenny Lalramchhuani, EE, PWD Khawzawl Division chuan Ngaizawl leh Neihdawn inkalpawhna kawng laih tlang hna zawhfel a ni chu lawmawm tih thu a sawi a. Khawzawl leh Ngaizawl inkalpawhna kawng siam meka concrete pavement zawh loh chhete awm chu naktuka zawh fel hman a beisei thu a sawi a. Khawzawl leh Neihdawn inkar Tuimuk Lei chim pawh RCC hmanga siamthatna tur estimate thehluh tawh a nih thu a sawi bawk.

Kawng hawnna puala hun hman hi Pu Lang Sian Kham, Ngaizawl VC Treasurer chuan kaihruaiin Pu Thang Sian Khai an hunserh a hmang a. MLA tawiawmtu Pu HS Vanlalfakzuala leh Pu PC Lalrinenga, Neihdawn VC Vice President ten thu an sawi bawk a. Pu Huat Za Bia, Ngaizawl NGO Chairman-in lawmthu a sawi a, hun hman hi khar a ni.

Ngaizawl leh Neihdawn inkalpawhna kawng kilometre 5 a thui, Lungtlanghing tlang kham pang hmarchhak lam hawi laih hna hi September ni 20, 2022 khan bultan niin, November ni 24, 2022 khan laih tlang a ni.

He hunah hian Dr. Lallawmkima DIPRO Champhai, Er. Lalrammawia SDO, PWD Khawzawl Sub-Division bakah Ngaizawl leh Neihdawn khawtlang mipuite an tel a ni.