3832/2022-2023

Aizawl, the 14th March 2023: Governor Hari Kambhampati chuan vawiin khan Raj Bhavan-ah Agriculture Department hotute leh an thawhpui company - Godrej Agrovet Ltd leh Patanjali Foods Limited official te a kawm a. He hunah hian hriak atana sawr chi thlai chi te, be chi hrang hrang(pulses) leh Oil Palm tharchhuah kawnga Mizoram dinhmun te PowerPoint hmanga thlir ho a ni a. Hemi hnu hian he hmalakna huanga tanlak chhunzawm dan tur leh harsatna thenkhat chinfel dan tur te sawiho a ni bawk.

Governor chuan National Edible Oil Mission-Oil Palm (NMEO-OP) kalpui mek a nih thu te, Prime Minister in state tin te hriak ei chi siam leh tharchhuah, pulses tharchhuah leh Oil Palm tharchhuah kawngah tan la zual tur a hriattir tawh thu te a sawi a. India ramin kum khat chhunga hriak ei chi a mamawh zinga za zela sawmruk lai chu ram dang – Indonesia leh Malaysia atang te in sum tam tak senin a lei thin a. Hetiang bawkin pulses – dal, bekang, chana leh a dang te pawh ramchhunga tharchhuah kan kham khawp lo hle tih a sawi a. He intodelh tura hmachhawp pawimawh takah hian Mizoram pawhin tih theih a nei a. Kan state hian hemi huanga hmalaknaah hian tan a lak nasat a ngai a. He hmalakna huangah hian hma kan sawn phawt chuan kan state sum thawhchhuah a pun bakah kuthnathawktute in hlawkna an tel dawn a ni a ti. Agriculture Department leh a thawhpui company te chu NMEO-OP inkhaihruaina anga theihtawp chhuah tur leh kuthnathawktute kaihruaia, an hmalakna te endik pui a, oil palm, hriak chang thei thlai chi – antam chi, bekang, chhawhchhi, etc leh pulses thar chhuah kawnga hmasawnna a awm theih nan tan la turin a fuih a ni.

Oil Palm hi Mizoramah kum 2005-06 atang khan The Mizoram Oil Palm (Regulation of Production & Processing)Act. 2004 peihfel a nih hnuah chin tan a ni a. A tira chhut dan chuan Mizoramah Oil Palm chin theihna hmun 66,791 ha. (3.16% of geographical area) a awm niin chhut a ni a. Hmalakna kalpui tak tak a nih hnuah Oil Palm hi 26,730 h.a a zauah chin a ni. Chhan hrang hrang avangin Oil Palm ching an tlem ta deuh a, tun hnaiah khan zirchianna neih a nih hnuin 3398 h.a. a zauah chiah Oil Palm hi chin mek a ni. Tunah hian Oil Palm hi District 7 ah chin mek a ni a, khaw 193 ah kuthnathawktu chhungkua 2733 ten Oil Palm huan an enkawl mek a ni.

Oil Palm rah hralhna rate hi International Market milin tih danglam a ni thin a. Formula Price of NMEO-OP chu November 2022 khan hman tan niin he me mila oil palm rah(FFB) hralhna rate chu tunhnaiah - November 2022 Rs. 10.63 per Kg., December 2022 Rs. 10.817 per Kg.,January 2023: Rs. 10.38 per Kg., leh February 2023: Rs. 10.28 per Kg ah te fixed a ni mek a ni.

Oil Palm chin chungchangah thuthang dik tawk lo vawrh darh a nih avangin mi tam takin Oil Palm chin an bansan niin an sawi a. He mi zirchiang tur hian mithiamte ruat an ni a, March 14, 2022 khan “Study Team for Pilot Research & Study on Oil Palm cultivation and its effect on the environment” tih chu din a ni tawh a ni.

Tunah hian Oil Palm Seed Garden chu West Serzawl Village, Mamit District kalpui mek a ni a. He huan atang hian kum 2024-25 chhoah Oil Palm chi tharchhuah tan beisei a ni a. Hetiang Oil Palm chi tharchhuahna hi India hmarchhak bialah chuan Mizoramah chiah a la awm a ni. He huan atanga Oil Palm chi hralh atang hian sum tam tham tak, kumtin lakluh theih beisei a ni bawk.

Hriak atana sawr chi thlai chi chungchanga report pek dan chuan Oilseeds atana hman Antam, Bekang, Chhawhchhi leh a dang te chu 3024 Ha a zauah chin mek a ni a, 3158 Mt vel thar chhuah thin a ni. Agrilculture Department hotute chuan a hlawm lian deuh a hriak chang thei thlai chi te lakkhawm a nih theih nan Oilseeds chingtute intelkhawmna pawl din a ni tawh a, tunah chuan awmze nei zawkin hmalakpui theih an ni tawh dawn tih an sawi a. SEDP hmalakna kaltlangin Bekang chi tam tham tak nikum lamah semchhuah a nih thu leh chumi a lo thar hunah Oilseed tharchhuah zar pawh a pun belh an beisei tih an sawi bawk.

Tunah hian Oil Palm sawrna hmun hi Bukvannei, Kolasib Districk ah Godrej Agrovet Ltd in a enkawl mek a. Kum 2014 atang khan chawl lovin Oil Palm hi an la her reng a ni. Vawiin khan Patanjali Foods Ltd aiawhtu chuan naktukah Lawngtlai District-ah Oil Palm herna tur bun turin inremna thuthlung ziah a ni dawn tih a sawi a. Ruahmanna awmsa ang chuan he Oil Palm herna hi Liapha hmun, Rualkual Khua, Lawngtlai District-ah bun a ni dawn a ni.

He meetingah hian Pu J. Hmingthanmawia, Secretary of, the Agriculture Department chuan Agricultural Department a senior officer te leh an thawhpui company official te a rawn ho a ni.