2434/2022-2023
Champhai, the 26th October, 2022: Mizo Hmeichhe Insuihkhawm Pawl (MHIP), North Khawbung Branch buatsaih Vangpui Day lawmna chu vawiin chawhnu dar 1 khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan khuallian niin a hmanpui a, Vangpui Day lawmna pual thilpek pawisafai Rs 10,000/- a hlan nghal bawk. He hunah hian North Khawbung VCP Pu F. Sangkhanenga chu khualzahawm a ni.

Khuallian Dr. ZR Thiamsanga chuan hrileng avanga kum hnih dawn nunphung a khaihlak hnuah Vangpui Day hun hlimawm tak, North Khawbung Branch MHIP ruahmannaa lawm a ni thei chu lawmawm a tih thu a sawi a. Nu-te chu chhungkaw khaidingtu berte an nih thu sawiin, nu a fel chuan chhungkaw inrelbawlna a fel nge nge thin a ni, a ti a. Mizoramah hmeichhiate dinhmun a that thu leh entawntlak a tih thu sawiin, hna tha leh zahawm tak tak bakah mawhphurhna sang tak tak hmeichhiate'n an chelh thin chu chhuanawm a tih thu a sawi bawk.

H&FW Board Vice Chairman chuan hrileng avanga harsatna tawh anih dan hrang hrangte sawiin, hmasawnna kawnga ruahmanna neih lawk hrang hrangte ataka puitlin anih hmain a khaihlak phah thu a sawi a. Harsatna karah pawh theihtawp chhuah zel a ni a, hmeichhiate hamthatna, himna leh an dinhmun chawikan kawngah sawrkarin theihtawp a chhuah zel dawn a ni, a ti. Hriselna leh zirna lama hmalaknate sawiin, Health Sub-Centre tinahte BSc Nursing Health & Wellness Officer dah anih thu leh Champhaiah MYC Coaching Centre kalpui a nih tawh thute a tarlang a. Khawtlang mipuite chu sawrkar ruahmannate a puitlin theih nan tha taka tawiawm turin a sawm nghal bawk a ni.

Champhai North bialtu MLA chuan ruihhlo leh thil dangin Mizo thalaite a suat nasat thu leh theihtawp chhuaha do tlan a tul thu sawiin, MHIP member-te chu hnam tlem zel tur ven nan an hriselna leh dinhmunin a zir ang zela fa neih tam tum turin a chah a. Ruihhlo leh khawtlang tana thil tha lo do kawnga tanrual puiah MHIP member-te a sawm nghal bawk a ni.

He hun hmanpuitu District Child Protection Officer Pi R.Lalrinchhani chuan nute chu fanau rochan enkawl kawngah chhungkaw dinhmun mil ang zela theihtawp chhuah thin turin a chah a. Naupangte chu nakin lawka khawtlang leh ram innghahna tur an nih thu sawiin, enkawlna tha pein nundan mawi kan zirtir em tih kan inzawh fo angai a, dikna leh chanvo an neihte kan zah sak fo tur a ni, a ti a. Dan hnuaia naupangte humhalh an nih dan hrang hrangte tarlangin, Champhai District-ah April 2012 atanga September 2022 thlengin a bik taka naupang venhim ngaite atanga Child Welfare Committee (CWC) hnena case lut 941 a awm thu leh, kum 18 hnuailam naupang hursualna lam rawngkaia khawih leh khuaikhem tawk 180 an awm tawh thu a sawi a, report lem loh pawh a awm nual a rinawm thu a sawi lang bawk a. Hursualna laka naupangte venhimna dan khauh tak, Protection of Children from Sexual Offences (POCSO) Act 2012 chungchang zirtirna a pe nghal bawk.

He hun Lal Thanghlianga Hall, North Khawbunga hman hi Pi Zodinmawii, Asst. Secretary, North Khawbung Branch MHIP chuan a kaihruai a. Secretary report Pi Thanthiangi hnen atangin ngaihthlak a ni a. He hunah hian zai, recitation leh lamte hmangin hun hlimawm tak hmanho a ni a. Pi Aikhumi, Branch MHIP Adviser-in lawmthu sawiin hun a khar a, Vangpui Day ruai kilho a ni bawk.