2435/2022-2023
Aizawl, the 26th October 2022: Vawiin khan Raj Bhavan-ah Governor Hari Babu Kambhampati leh Health Department hotulute an in kawm a. He hunah hian Health Department hnuaia Healthcare service hrang hrangte kalpui mek a nih dan te, tha zawka kalpui a nih theih dan tur te sawiho a ni.

Governor Hari Babu Kambhampati hova meeting-ah hian Health & Family Welfare Department hnuaia mipui hriselna tur state leh central sawrkar hmalakna hlawm lian deuh deuh te Pi Esther Lal Ruatkimi, Principal Secretary chuan PowerPoint hmangin a sawifiah a. Directorate of Health Services, Directorate of Health & Medical Education, Office of Mission Director, NHM, Zoram Medical College(ZMC), MSACS leh Program Cell thenkhat hnuaia hmalakna pawimawh tak tak te chipchiar takin sawiho a ni a. Heng hmalaknaah te hian Central sawrkarah nawr ngai te pawh a awm nia sawi niin Governor chu Ministry of Health & Family Welfare lam dawrpui tura ngen a ni bawk.

Governor chuan Health Department hnuaia hmalaknate state mipui tana thil pawimawh ber pakhat a ni tih a sawi a. Tun dinhmunah thawk tha thawkhat mahse tanlakna tur kawng tam takah a la awm thu sawiin Health Department hotute chu tan la zel turin a fuih a. Healthcare Scheme hnuaia inziaklut an rawn pun chhohna turin theihtawp chhuah a ngai tih a sawi a. District hospital thenkhatah Specialist Doctor dah tur an vang chu pawi a tih thu sawiin he harsatna hi a tuartu chu damlo te an nih avangin a rang lama chinfel a ngai a ni a ti.

Governor chuan Mizoramah ramhmul damdawi siam turin hmalakna a awm tan chu tha a tih thu a sawi a. Health Department pawhin Mizo ramhmul damdawi siamchhuaktute chu certification an nei theih nan lo tanpui se a tha hle ang a ti. Hmanlai atang tawhin Mizo pi leh puten damlo enkawlna atan ramhmul damdawi an lo hmang thin tih a hriat thu a sawi a. Heng ramhmul damdawi hriat tlanglawn te hi Health Department ten lo khawnkhawm se, Ministry of Ayush hnenah zirchian tura thehlut turin Health Department hotute chu thurawn a pe bawk a ni.

Meeting-ah hian Dr T.Lalhmangaihi, Principal Director, H&FW, Dr KK Chhetri, Director, DHME, Dr John Zohmingthanga, Director, ZMC, Dr Eric Zomawia, MD, NHM leh program cell lian deuh a hotulute pawh an tel a ni.