No.5594/2020-2021

Dated Champhai, the 30th September, 2020: Sawrkar laipui Ministry of Child Development leh Mizoram sawrkar Social Welfare Department kaltlanga sak hmeichhe baihvaite tlukluh lailawkna hmun ‘One Stop Centre (OSC)’ Building thar Champhai Vengsang a mi chu vawiin chawhma khan Vice Chairman, Health & Family Welfare Board Dr. Z.R. Thiamsanga, Champhai North bialtu MLA ni bawk Khuallian niin a hawng. One Stop Centre room hrang hrangte fangin a enfiah a ni.

Khuallian Dr. Z.R. Thiamsanga chuan One Stop Centre awmzia leh hnathawh phung chuan a rilru a hneh hle thu sawiin, hmeichhe chanhai leh riangvaite tlukluhna hmun One Stop Centre chu rawngbawlna pawimawh tak, taksa hrisel, rilru leh thlarau nun thlenga kaihhruaina hmun anih thu a sawi a. Sawrkarin hmeichhiate chanvo chawisanna leh chhawmdawlna a ngaih pawimawh thu sawiin, department mal chauh hmalakna tur niloin tha thawh theihna zawnah department dangte pawhin tha thawhin kan zavaia tanho a ngai dawn a ni, a ti a. Beisei aia changtlung One Stop Centre sak ani chu lawmawm tiin, veng chhung mipui, kohhran leh khawtlang ang pawhin ngaihven zuia, mawhphurhna nen neitu thinlung pu chung zela kan enkawl angai dawn a ni, a ti bawk. Ramri depa awm Champhai district chhungah ruihhlo leh a kaihhnawihte tawlh leh hman a hluar avangin One Stop Centre mamawhna chu a san zel a rin thu sawiin, One Stop Centre in mamawh a neih chuan a phak ang tawka tanpui a inhuam thu a sawi a. Din anih chhan ang ngeiin One Stop Centre Champhai chu mite tana malsawmna a lo nih zel theihna turin duhsakna a hlan nghal a ni.

He hun hi Pu Zothanmawia CDPO Champhai chuan a kaihruai a. Pi Malsawmkimi, District Centre Administrator, OSC chuan kalkhawmte lawmna thu a sawi a. Bawrhsap Pi Maria C.T Zuali'n lawmthu sawiin hun a khar a ni.

One Stop Centre (OSC) hawn thar tak hian an hnena tlulutte thlenna tur Room 3, khum 5 awmna a nei a. Eirawngbawlna hmun, Counselling Room, Video Conferencing Room, Staff room leh inthiarna tha tak a kentel mai bakah CCTV Camera vuah a ni bawk.

One Stop Centre Champhai hi awmnem zawk hmeichhia, hleilenna chi hrang hrang tuar te’n rikrum thila harsatna leh vanduaina an tawh changa an tlanluha an inhumhimna tur atana din a ni a. Hmeichhe mangang an hnena sahimna zawnga tlulutte enkawl turin District Centre Administrator, Case Worker, Counsellor, Para Medical, Data Analyst, Multipurpose Staff pakhat theuh bakah Security Staff 2, an vaiin mi 8 an awm mek a, engtik lai pawhin biakpawh theih reng an ni a, biakpawk theihna phone number chu 9774609552/8259909681 a ni. August Ni 7, 2019 atang khan One Stop Centre Champhai hmingin hna thawh tan a ni a, vawiin thlengin anmahni beltu hmeichhe 23 te an lo enkawl tawh a ni.