No.5593/2020-2021

Vawiin chawhnu a Puanthui khawl semna Dinthar YMA Hall a neih-ah RD Minister Pu Lalruatkima chuan Mizoram-ah Job Card 201107 chhungkua an awm mek tih a sawi a. Chief Minister Pu Zoramthanga hmalakna leh a kaihhruaina hnuaiah Thingtlang mipuite hmasawn nan theih tawp chhuahin Rural Development Department chuan hma a la zel a. Central Sorkar atangin tun kum kal mek (1st April, 2020 – 29th September, 2020) chhung hian MGNREGS hnuaia Ni 100 inhlawhna (Wages) sum hmuh dawn tawh zat chu Cheng Nuai 27907.90 a nih thu sawiin he mi hmang hian chawhrualin Mizoram chhunga thingtlang mipui Job Card holders zawng zawngte inhlawhna Ni 62 theuh siam sak tawh ani chu thawk tute thahnem ngaihna-ah lawmthu Minister chuan a sawi a ni.

Tun dinhmunah Job Card Holder pakhat hian ni khatah Rs. 225/- zel ah hlawhin tun thla kal mek September-ah hian mipui inhlawhna Ni 10 dang thawh/buatsaih leh mek a ni bawk tih RD Minister chuan a sawi a. Thingtlang mipuite inhlawhna hi anmahni Bank Acount-ah direct-in dahluh sak mek zel an ni nghe nghe. Hei hian hripui leng mek avanga thingtlang mipuite harsatna pawh nasa takin a chhawk zangkhai nia an hriat thu Minister chuan a sawi a ni.

Ni 25th Septemnber,2020 khan thingtlang mirethei insak tanpuina turin Cheng Nuai 500 (Central Share) leh Cheng Nuai 121. 274 (State Share) chu Finance Department atangin Rural Development Department chuan an dawg tawh tih Minister chuan sawiin, thingtlang mirethei insak tanpuina chhungkaw 191 (1st installment), chhungkaw 64 (2 installment),leh chhungkaw 937 (3rd installment) bakah chhungkaw 1562 (4th installment), a vaiin chhungkaw 2754 te insak chhunzawmna tur a daih dawn a. Heng insak tanpuina pawisa hi PMAY-G beneficiary-te account theuhah thun mek a nih thu RD Minister chuan a tarlang bawk a ni. Minister chuan puanthui khawl semtak dawng tute chu an bul tannan beitham angin lang mahse tihtakzeta beihna nen chuan eizawnna tha zawk an hmuhchhuah ngei a beisei tih sawiin khawl an dawn te chu tiral mailoa tangkai taka hmang turin a chah a ni.

Puanthui khawl hi Aizawl West II bial veng 6 tan sem niin khawl 105 an sem a ni.