No.3623/2021-2022
Aizawl, 11th January, 2022: Health & Family Welfare Board Vice Chairman Dr. ZR Thiamsanga, Champhai North bialtu MLA ni bawk chuan Champhaia Filling Station palina ni turin Ramsanga Filling Station, Indian Oil Corporation (IOC) Ltd. kaltlanga siam chu tukin dar 7:00 khan New Champhaiah a hawng.
Filling Station hawnna puala inkhawm tawi buatsaihah Dr. ZR Thiamsanga chuan thu sawiin, Covid-19 hrileng kara khawvel pum a buai mek laia hmasawnna rahbi pawimawh tak Filling Station thar Champhaia siam a ni chu lawmawm a tih thu a sawi a. Filling Station hawn belh leh a ni chuan Champhai District chhunga lirthei chevelte tana pawimawh tak Petrol leh Diesel mamawhna a phuhruk zual ngei a beisei thu a sawi bawk.
Champhai khawpui chhung hmunhma rem taka Filling Station thar din a nih theihna tura hmalatu Ramsanga Filling Station neitute leh Indian Oil Corporation Ltd. hmalakna fakawm a ti a. Mipuite tana dawr nuam leh fel tak nih tum tura fuihin, petrol leh diesel pawlh dal leh dan dik lova thiltih dangte laka fihlim tur leh a vengtu ni zawk turin a chah a. Kangmei leh chhiatna thleng thei dangte laka Filling Station a him theihna tura hmalakna tulte ngaipawimawh fo thin turin a chah bawk a. Ramsanga Filling Station chu lirthei neitute leh khualzin mite tana chhenfakawm tak ni tura duhsakna hlanin a hawng a ni.
Ramsanga Filling Station neitu Pu F. Vanramsanga, Republic Veng, Aizawl pawhin thu sawiin, Filling Station puahchah hna chu duhthusam anga zawhfel ni chiahlo mahse hripui leng a zual zel avanga hmanhmawh thila hawn a nih thu a tarlang a. A hmunhmate company duhdan anga siam a nih thu leh thawmthat leh cheibawl kawngah a tul angin company nena inrawn chung zela hmalak tum a ni, a ti bawk.
He hun hi Pu Lalnunmawia, Chairman, NGO Coordination Committee Champhai chuan a kaihruai a. Upa H. Lalrammawia'n Filling Station hlanna hun a hmang a. New Champhai VC leh SBI hotute hnen atangin thusawi ngaihthlak a ni bawk.
Vawiina hawn tak Ramsanga Filling Station nen hian tun dinhmunah Champhaiah Filling Station 4 a awm mek a. Tihfel leh buaipui ngai dangte a la awm avangin ruahman lawk dan chuan Petrol leh Diesel hi tun thla January ni 20, 2022 atanga zawrhchhuah tan tum a ni.
Attachment
- Loading attachment...
