No.3056/2021-2022

Aizawl, 19th November, 2021: MZP Ngur Branch buatsaih Zirlai tithate chawimawina Ngur Community Hall-a neih chu vawiin khan Health & Family Welfare Board Vice Chairman Dr. ZR. Thiamsanga, Champhai North bialtu MLA chuan khuallian niin a hmanpui a, Zirlai hlawhtlinna chang Memorial Award 2 leh Special Award 1 tiamin mi 36 te hnenah chawimawina thuziak cheimawi a hlan bakah, MZP Ngur Branch kutah lawmpuina Rs. 10,000/- a hlan bawk. He hunah hian Pu Lalnunmawia Pautu, President, MZP General Hqrs. chu khualzahawm a ni.

He hun Tv. C. Lalduhawma, MZP Ngur Branch Vice Chairman kaihhruaiah khuallian Dr. ZR. Thiamsanga chuan thusawiin, 23-Champhai North bial Model village a puan Ngur khuaa Zirlai tithate lawmpuina buatsaih a ni chu lawmawm a tih thu leh Mizoram leh India rama lang tham ni thei tura hmasawnna rahbi zawh kawnga tanlak sauh sauh a tul thu a sawi a. Hmuh theiha zirna kawnga hmasawnna Ngur khuain a nei chu lawmawm tiin, Mizoram puma titha berte zinga langpha an nei chu chhuanawm a tih thu a sawi bawk.

Covid-19 Medical Operational Team (MOT), Mizoram Chairman ni bawk chuan Covid-19 dona kawnga khawtlang tawiawmnaah lawmthu a sawi a. Hripui lengin ram changkang leh hmasawn zawkte tiamin a tihbuai vek thu leh hri do kawngah inzirthar chung zela theihtawp chhuaha thawhhona tha tak hnuaiah hmalak a nih thu sawiin, India ram state zingah Covid case neih tam dan a zira thi tlem ber kan ni thei chu lungrual taka kan thawhhona rah a ni, a ti a. Hripui leng karah Health infrastructure siam kawngah hmasawnna nasa tak neih a nih thu tarlangin, ICU khum siam belh zel a nih bakah Oxygen siamna khawl minute khata Oxygen litre 2000, 1000, 500 leh 200 te siam chhuah theihna engemawzah siam belh a nih thu a sawi a. JAICA nena thawkdunin Cancer Hospital khum 500 awmna siam tura inremna siam a nih thu leh Cancer hemna khawl tha takte chhawpchhuah a nih thu a sawi a. Mizoram chhunga Health Sub-Centre za a 60 (60%) te Health & Wellness Centre-ah hlankai an nih tawh thu leh Champhai District bikah chuan Health Sub-Centre 2 tih lohte hlankai tawh an nih thu a sawi bawk.

Model village an nih angin a tha zawnga midangte zirtur kawhhmuhtu nih tum turin a chah a. Tui harsatnate sukiang turin JJM hnuaiah hnianghnar  taka tui nei tura hmalak tan tum a nih thu a sawi a. Land Development hnuaiah Ngur leh Hnahlanah hmalakna lian tak neih tum a nih thu a sawi bawk. Ngura zirna in te sak that mek a nih thu sawiin, Ngur tlang mawi tak tlawh theiha cheibawl turin hma lak chhoh zel tum a ni a ti a. Health Sub-Centre building sak that tum a nih thu a sawi bawk.

Zirna chawisan leh tihhmasawn kawngah sawrkarin theihtawp a chhuah chhunzawm zel dawn thu sawiin, hripui vanga zirna kalpui kawngah harsatna awm chung pawha  Zirlai hlawhtlinna chang thahnem tak an awm chu lawmawm a ti a. Sawrkar fawng chelhtu lian officer leh central services neih belh turin zirna lama intlansiak kan ngai a, state leh ram inrelbawlna sang zawkah Mizo tam zawk kan luh loh chuan hnam dang ten fawng pawimawh tak tak chelhin min la awp dawn a ni, a ti a. Harsa taka lehkha zira hlawhtlinna chang ta a nih dante Zirlai chu hrilhin, tumruhna, taimakna leh beih hram hramna nena theihtawp chhuaha lehkha zir tur leh retheihna hneha hlawhtlinna chang tum turin a chah a. Nakin lawka ram leh hnam inghahna ni mai tur Zirlaite chu nunphung hrisel leh zahawm zawh tura fuihin an kalzelna turah duhsakna a hlan a ni.

Thusawitu dang khualzahawm MZP Gen. Hqrs. Aizawl President, Pu Lalnunmawia Pautu chuan Ngur Branch MZP leh Zirlaite thahnemngaihnaa Zirlai tithate chawimawina neih a ni chu fakawm a tih thu sawiin, Zirlaite chu khawtlang leh ram tan enge ka thawh theih ang tih ngaihtuah thin turin a chah a. Nu leh pa te zaha chawimawi thiam turin a fuih bawk a. Ngaihsan leh ngaihhlut tur dik tak ngaihlua chawisan thiam a pawimawh takzet thu a sawi bawk.

He hunah hian NI. C. Vanlalringzeli, Adviser, MZP Ngur Branch-in tanna hun a hmang a. Tv. Joseph Lalawmpuia, Secretary, MZP Ngur Branch hnen atangin report ngaihthlak a ni a. International Friendship Society (IIFS) hnen atanga India khua leh tui mi dangte tana hnathawk tha chawimawina Rashtriya Gaurav Award dawngtu bialtu MLA hnenah Ngur VC hmingin Pu C.Lalsawmliana'n lawmpuina momento a hlan a. Pu H. Tawnga, VCP Ngur leh Pu Thangdeihmunga, Vice President, MZP Sub-Hqrs. Champhaite hnen atangin thusawi ngaihthlak a ni bawk a. NI. Lalnunmawii, Executive Member, MZP Ngur Branch-in lawmthu sawiin hun a khar a ni.