No.3055/2021-2022

Aizawl, 19th November, 2021: Indona avanga ram leh hnam tana nun hlantute hriatrengna leh zahna lantirna lungphun War Memorial, Champhai DC hmun hluia siam cheithat chu tukin dar 8 khan Champhai District Bawrhsap Pi Maria C.T Zuali, Chairman, Zila Sainik Board (ZSB) Champhai chuan ribbon chepchatin a hawng.

War Memorial cheithat hawngtu Champhai DC Pi Maria C.T Zuali chuan ram leh hnam tana nun hlantute hriatrengna leh zahna lantirna hmun War Memorial cheithat mawi leh zahawm tak hawn theiha peihfel a ni ta chu lawmawm a tih thu sawiin, ram leh hnam chhana venghim thintu sipaite chu sawrkarin a ngaipawimawh em em a ni, a ti a. Indona avanga nunna chante kan ngaihluin an inpekna hlu tak chu kan theihnghilh tawh ngai dawn lo a ni, a ti bawk.
International boundary depa awm Champhai District-ah dan lova sumdawnna, ruihhlo tawlh leh thil thalo dangte a awm thin avangin Ex-Servicemen-te chu an hna atangin chawl tawh mahse khawtlang leh District siamthat kawngah an rilru leh ngaihtuahnate seng a, theihtawp chhuahpui turin a sawm a, an finchhuahna leh tawiawmna a ngen nghal bawk a ni. Harsatna an neihte a hnena thlen hrehlo tura chahin, a theih ang zela bawhzui sak a inhuam thu a hrilh a. Ex-Servicemen boralte nupui pension lak kawnga harsatna neite chu an harsatna a hriatthiampui thu leh a tul anga bawhzui sak a inhuam thu a sawi bawk.

He hun kaihruaitu Sub/Maj Lalparmawia, President, Mizoram Ex-Service League, (MESL) Sub Hqrs. Champhai chuan hruaitu hmasate lo sualchhuah War Memorial Champhai District Bawrhsap leh District Sainik Welfare & Resettlement Officer-te  thahnemngaihna kaltlanga cheithat a ni ta chu lawmawm a tih thu sawiin pawl aiawhin lawmthu a sawi a. A enkawl leh venhim chu member tinte mawhphurhna a nih angin pawl member-te chu an rohlu enkawl zui kawngah thahnemngai taka thawk turin a sawm bawk.

He hunah hian Upa B. Hranghlira'n hunserh a hmang a. Maj John V.L Khawlhring, District Sainik Welfare & Resettlement Officer (DSW&RO) hnen atangin thusawi ngaihthlak a ni bawk a. Martarte zahna chibai bukna hun hman a nih hnuah, Deputy Commissioner Pi Maria C.T Zuali, Addl. District & Sessions Judge Pi Sylvie Z.Ralte,  District Sainik Welfare & Resettlement Officer Maj John V.L Khawlhring, 8 Assam Rifles Champhai Commandant Maj. Sunny Tomar leh DIPRO Dr. Lallawmkima ten War Memorial-ah zahna pangpar an dah a ni. 

War Memorial hi kum 1997 khan tuna DC hmun hluiah hian siam a ni a. DC Office leh District Sainik Welfare & Resettlement Office hmalaknain Rs. 1,50,000/- (cheng nuaikhat leh singnga) sengin thla hmasa October kartawp  khan siama cheithat a ni a. War Memorial lungphunah hian indopui pakhatna leh pahnihna bakah India ramin zalenna a neih hnu indona hrang hranga ram leh hnam tana nunna hlu tak hlantu sipai 17 te hming a chuang a, remchang hmasa berah 1 ziah belh leh tura ruahman a ni.

Tun dinhmunah Undivided Champhai District chhungah Ex-Servicemen member 751 leh Ex-Servicemen Widow 250 an awm mek a ni.