No.3054/2021-2022

Aizawl, 18th November, 2021 : Nimin (November ni 18, 2021) khan Ministry of Ministry of Micro, Small & Medium Enterprises (MSME), Government of India bul tumin, North-East MSME Conclave,  Hotel Taj Vivanta, Guwahati-ah hman a ni a. He hun hi Pu Narayan Rane, Union Minister for MSME chuan hmanpui a. India hmarchhak State hrang hrang atangin Commerce & Industries Minister-te an tel a ni.

He Conclave-ah hian Union Mister chuan sawrkar laipuiin hmarchhak state-te a ngaih pawimawh thu a sawi a. India ram puma MSMEs awm zingah, 1% (za zeal pakhat) ang chauh hmarchhak-ah a la awm thu leh India Act East Policy chak zawka kalpui turin hmarchhak state-te tih hmasawn a pawimawh a thu sawiin, hmarchhak state ti hmasawn tur chuan hmarchhaka MSME te’n hma an sawn a ngai a ni’ a ti.

Mizoram atangin Dr. R. Lalthangliana, Minister, Commerce & Industries Department chu he conclave-ah hian a tel a. Thu sawina hun tha tak changin Minister hian Mizoram-a Industry te dinhmun leh Covid-19 hripui vanga Industrial unit-ten harsatna an tawh hrang hrang te a sawi a. Mizoram chu hripuiin a nuai nat ber zinga mi a nih avangin, Industry tenau (Micro Enterprises) te’n an tuar nasa em em a, anmahni chhanchhuahna tur Central Sorkar atanga tanpuina pek an nih loh chuan Industrial Unit tam tak chu hnathawk chhunzawm thei lo va khar mai hmabak an ni, a ti. Hetiang a nih avang hian Micro Enterprise te chhanchhuahna tur Concept Note an siam thu leh MSME Ministry-ah an thehluh tawh thu a sawi a. Union Minister chu Mizorama industrial unit-te khai chhuahna tura a bik taka tanpuina pe turin a ngen a ni.

Minister hian DONER leh MSME ministry ah te pawisa a tam thu sawiin, heti a nih rual hian Mizoram leh hmarchhak state te natna damdawi tak hi min la chawh thiam lo a ni a ti a, kalphung khirhkhan lutuka an siam hi hmarchhak state te tan bika thlahdul deuh a ngai a ni, a ti a. Central guidelines ang diak diaka kal hi hmarchhak state hrang hrangahte hian a remchang lova, chhan hrang hrang a awm avangin kan state te ang tan chuan a bik deuh her rem a ngai a ni, a ti.

He conclave-ah hian MSME Ministry hnuaia Scheme awm hrang hrangte tarlan a ni a. Heng scheme hrang hranga hmarchhak state-in harsatna a neihte sawilan a ni. Ministry scheme-te hi awlsam zawk leh rang zawka mipuiin an chhawr theih tura siam that an duh thu leh PMEGP diltute’n Bank lama harsatna an neih thin thu hmarchhak minister-te hian an sawichhuak a ni.

Minister hian Union Minister hi a hranpa a hmu lehin MSME a an proposal thehluh chungchang khunkhan takin a sawi opui a ni.

Minister hi Pi Esther Lalruatkimi, Commerce & Secretary, Commerce & Industries Department, Pu Lalhmunsiama, Additional Director, Commerce & Industries Department leh Department Official dang te’n an tawiawm a ni.

Attachment

  • Loading attachment...