Assembly Constituency pasarih awmna Lunglei District Draft Photo Electoral Roll 2018 chu Election Commission of India ruahmanna angin vawiin chawhma dar 10:00 khan Lunglei District Election Officer leh DC ni bawk Pi Lalzarmawii, IAS chuan DC Conference Hall-ah a tlangzarh. Vawiin Draft Electoral Roll tlangzarhna programme-ah hian election lam kaihhnawih sawrkar official te bakah Political Party hruaitute, MJA hruaitute leh tlawmngai pawl aiawhte an tel tha hle. 

Pi Lalzarmawii chuan Special Summary Revision hna kal mekah political party, tlawmngai pawl leh chanchinbu miten mawhphurhna sang tak an nei a ni tiin Lunglei District chhunga Electoral Roll dik leh felfai tak nei turin theihtawp chhuah theuh turin a sawm a. He Summary Revision atan hian ngawrh takin inbuatsaihna kalpui mek a ni a, August thla chhungin ‘Special Drive of E-Roll’ neih a nih bakah Lunglei District huamchhunga Electoral Registration Officer, Asst. Electoral Registration Officer leh Booth Level Officer (BLO) te tan training buatsaih chhoh mek a nih thu Lunglei DC chuan a tarlang a. Mipuiten kan vote duhna takah kan thlak ngei ani tih finfiahna Voter Verifiable Paper Audit Trail (VVPAT) chu nakum election-ah hman a nih tur thu a sawi bawk. Election Branch a thawktute thahnem ngaihna leh thawhrimna chu fakawm a tih thu sawiin Pi Lalzarmawii chuan kalkhawmte chu neitu rilru pu chunga Special Summary Revision 2018 hna chu kalpui turin a chah. 

Hemi hunah hian Election Officer, Lunglei District Pu James Lalnithanga pawhin thu sawiin Draft Photo Electoral Roll chu tangkai taka hmang turin kalkhawmte a chah a. Hming thunluh, transfer, paih leh Roll-a hming siamthat duhte tan 15/09/2017 – 13/10/2017chhungin dilna siam hun a in hawn thu sawiin Pu James Lalnithanga chuan Special Summary Revision hun chhungin diklo awmte siam that a nih tur thu a tarlang bawk. 

Draft Electoral Roll in a tarlan dan in Lunglei District dinhmun chu hetiang hi a ni.

Vawiina Draft Photo Electoral Roll tlangzarh hi Pi Lalzarmawii chuan Political Party aiawhte hnenah a hlan nghal a ni.