Election Commission of India thupek angin vawiin khan 1.1.2013 a kum 18 tling ching tan hming thunluh, paih leh siamthat hun Special Summary Revision of Electoral Rolls, 2013 neih tura Draft Electoral Roll chu mipui te en theih turin tarchhuah a ni a. Bialtu Electoral Registration Officer, Asst.Electoral Registration Officer, Booth Level Officer-te hnenah a duh apiang tan entheih a ni.

Aizawl District-ah Assembly Constituency 14, Polling Station 323 a awm a. Vawiin atanga July ni 15 thleng hian Roll a thun, paih, hming siamthat ngaite tan dilna hun hawn a ni a. July ni 16 atanga ni August ni 8 chhung hian ERO/AERO te kaihhruaiin khua leh veng tina Local Council, Village Council, tlawmngai pawl leh Booth Level Officer ten an enfiah ang. Hming thunluh, paih leh siam that duh te chuan bialtu ERO/AERO/BLO te hnen atanga form lachhuakin huntiam chhung hian thehluh tur a ni.

Draft Electoral Roll a lan dan chuan Aizawl District chhungah voters mipa 1,22,941 hmeichhe voters 1,33,449 an vaiin voters 2,56,390 an awm. Roll tarchhuah hnuhnung ber nena khaikhinin voters 77-in an kiam a, chu chu za zela 0.03% a ni.Election Commission of India in ruahmanna a siam angin mi tupawhin Draft Electoral Rolls hi a soft copy a lei duh chuan cheng 100 in a lei theih a, hard copy phek khat cheng 5 zelin a lei theih bawk.

Vawiina Draft Electoral Roll chungchang meeting hi Aizawl District Addl. DC Pu Lalchungnunga hova neih niin political party hrang hrang aiawhte bakah a kaihhnawih officer pawimawh engemawzat an tel a ni.