State Election Commission thupek angin District paruk - Aizawl, Lunglei, Serchhip, Champhai, Mamit, Kolasib District a Village Council Electoral Rolls buatsaihtu atana ruat Electoral Registration Officer te chuan kum 2012 a Village Council inthlanna a hman tur Draft Village Council Electoral Rolls chu November 1, 2011 hian an tichhuak a. He Draft Village Council Electoral Rolls hi Deputy Commissioner’s Office, District Local Administration Officer’s Office-ah leh khawtina Village Council President te hnenah en theih tura tarchhuah a ni.

He Draft Electoral Rolls a thun hmaih emaw thun tawh sawisel duh nei te chuan ni 2.11.2011 atanga 18.11.2011 thleng hian Electoral Registration Officer (ERO) emaw Assistant Electoral Registration Officer (AERO)/ District Local Administration Officer (DLAO) te hnenah dilna thehluh tur a ni. Kum 2012-ah Village Council inthlanpui neih a hun leh dawn avangin siamthat ngai leh thunluh belh ngai nei te chuan ngaihven ngei tur a ni a, State Election Commission chuan mitin te mahni chanvo ‘vote’ kan thlak ngei theih nana hma la turin a ngen a ni. He Draft Electoral Rolls ang hian District parukah te hian vote nei thei mi 4,08,775 an awm a, heng zinga mi 2,03,410 hi mipa an ni a, 2,05,635 hi hmeichhia an ni. Mamit District tih lohah chuan mipa aiin hmeichhia an tam zawk vek a ni. Kum 2009 Village Council inthlana vote nei thei aiin mi 38,212 in vote nei thei hi an pun belh a, a punna hi 10.30% a ni. Vote nei thei punna Mamit District-ah 21.46% niin a sang ber a, Kolasib District-ah 6.33% niin a hniam ber a ni. District paruk a chhungkaw awm zat hi 1,25,077 a ni a, chawhrualin chhungkaw pakhatah vote nei thei mi 3.23 awm ang zel an ni.

He Draft Electoral Rolls sawiselna emaw siamthat leh inthunluh diltute dilna chu ni 21.11.2011 - 30.11.2011 chhung hian chinfel a ni ang a, 1.12.2011 - 31.12.2011 chhung hian Final Electoral Rolls buatsaih a ni ang. Ni 12.1.2012 ah Village Council Election 2012 a hman tur Final Rolls chu tihchhuah a ni ang. State Election Commission chuan Electoral Rolls felfai leh tha kan neih theih ngei nan Political Party, NGO leh mitin te chu State Election Commission leh Rolls siam hnathawktu zawng zawng te theihtawp chhuaha tawiawm turin a ngenin a beisei a ni.