993/2024-2025

Dated Kolasib the 28th June, 2024: Nimin khan Kolasib District a dragon fruit sawngbawlna chu Kolasib District MJA ten an tlawh a, dragon fruit sawngbawl dan leh an hmachhawp zel tur te Kolasib Agro Marketing Cooperative Society Ltd (KAMCO)   te nen an sawiho a ni.

Kolasib district a Dragon fruit tharchhuah te sawngbawla hlu zawka siam leh rei zawk dahthat a nih theih nan Kolasib Agro Marketing Cooperative Society Ltd (KAMCO) chuan hma lain FOCUS Mizoram tanpuina in Dragon Fuit Tui sawra sawngbawlna an kalpui tan meka, amaherawh chu an dragon fruit tui sawr dah khawlna tur Tanky an neih tam loh avangin kumin chung hian Quintal 80 - 100 vel bak an lei theih loh tur thu Pu R Lalhmingthanga Chairman KAMCO Society chuan a sawi.

Tunlai hi Dragon fruit thar chhoh hun lai ani a, KAMCO Society hian kolasib dist a farmer te tharchhuah Dragon fruit leiin an sawngbawl meka, hetianga KAMCO Society te hmalakna Kolasib hmarveng a awm chu Kolasib District MJA te chuan tlawhin, Dragon fruit an leikhawm dan leh an sawngbawl dan te KAMCO hruaitu te chuan an lo hrilhfiah a ni.

Pu R Lalhmingthanga, Chairman KAMCO Society sawi danin, KAMCO Society hi Kuthnathawktu te tana din niin, kum 2022 kumtawp lam khan an din tana, kuthnathawktu te hlawhtlinna in a nawr avang te, FOCUS Mizoram, Cooperative Society leh Horticulture Dept ten an thlawp that avangin an pawl chu chak taka kalin, kum 2 pawh a pumhlum hmain Kuthnathawktu te tan an che chhuak thei chu lawmawm an tih thu a sawi a. Hetihlai hian Dragon fruit tui sawra sawngbawl tur hian Horti Dept leh Science & Technology dept te be rawn chungin an Society din hma atangin Trial process an lo kalpui tawh thu leh, Trial process atanga Sample Product an siamchhuah te pawh Mizoram chhung Official Agri & Horti Fair ah tum hnih ngawt an phochhuah tawh thu te, Delhi thleng pawha an in phochhuah thu te a sawi bawk.

KAMCO Society hian hetianga Dragon fruit tui sawr an kalpui chung hian a Fruit hralh turin hma an la meka, Shillong Guwahaty leh Agartala ah hnamdang sumdawng lian te dawrin Dragon fruit hralhna kawng an dap renga, Fur ruahtui avanga kawng chhia leh harsatna dang te avangin tun dinhmunah an la thawnchhuak thei lo tih sawiin, kumin chhungin state pawna thawn chhuah theih ngei an beisei tih an sawi bawk.

KAMCO te hian Dragon fruit Juice Processing an kalpui mekah hian an member mi 5 bakah hlawhfa 3 an vaiin mi 8 an thawk a, kuthnathawktu te tharchhuah Dragon fruit an leisak bakah mi thenkhat tan hnathawh tur an siamsak thei chu an lawm thu sawiin, mizo ten kan thlai neih zinga sum kan chantir ngai loh Theiherawt pawh engemaw zat a tui sawr tura an lei tawh thu leh, lei zel an la tum thu an sawi bawk.

Dragon fruit sawngbawlnaKolasib district hi mizoram a Dragon fruit tharchhuak hnem ber niin, nikum khan Quintal 800 chuang an tharchhuak a, kumin ah hian quintal 1000 chuang tharchhuah an beisei.