992/2024-2025 

Aizawl, the 28th June 2024: Vawiin khan Governor Dr Hari Babu Kambhampati chuan  2 Assam Rifles Zokhawsang Complex-ah NIEDO Second Batch coaching a hawng. JEE, NEET leh allied exam dangte entrance exam-na atana open house mentoring camp hi Assam Rifles, National Integrity & Educational Development Organisation (NIEDO), & Axis Bank te thawhhona a ni.

Governor Dr Hari Babu Kambhampati chuan he hmalakna hi Mizoram thalaite tan a hluin a tangkai tih a sawi hmasa a. Zirna hi ram leh hnam tihhmasawnna atan bakah inpumkhatna atana hmanraw thil ti thei ber  a ni a ti. Axis Bank, NIEDO leh  Assam Rifles ten Mizo te hmakhua ngaia, zirlai zinga chhungkaw khawsak harsa zawk te tana  India rama zirna in tha filawr luh theihna kawngka an hawng chu lawmawm a tih thu a sawi bawk.

Governor thusawi kimchang: https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-inauguration-of-niedo-second-batch-at-zokhawsang-complex-2-assam-rifles-on-28th-june-2024

September 27, 2023 khan Governor Dr Hari Babu Kambhampati hmaah HQ 23 Sector, Assam Rifles, NIEDO, leh Axis Bank te chuan  thawhhona thuthlung an lo ziak tawh a.  He thawhhona hnuaia project “Sentinel Centre” hnuaiah hian ei leh in leh awmna a thlawn veka tum sakin chhungkaw harsa zawk atanga zirlai pawl 12 pass te tan JEE, NEET leh a tlukpui Entrance Exam hmachhawn tura Coaching buatsaih a ni. He project atan hian Axis Bank chuan CSR hnuaiah kum 4 chhung atan Rs 3.9 Crore (approx) a sanction a ni.

Nikum khan entrance exam-ah hian Mizoram District hrang hrang atangin zirlai 186 an inlan a. Final stage-ah zirlai 30 thlan chhuah an ni. Training hi January thla aṭang khan ṭan a ni a, thla li chhung awh a ni a. Heng zirlai 30 zingah hian JEE exam-ah pakhatin hlawhtlinna a chang a, NEET exam-ah mi 20 an hlawhtling bawk. Kumin hian NIEDO second batch entrance exam-ah hian zirlai 436 an inlan leh a. Chung zinga zirlai 144 chu interview atan thlan an ni a, a tawpah zirlai 30 thlan chhuah an ni.

Inaugural function hi Brig Girish Upadhya, SM, VSM, DIG, 23 Sector Assam Rifles chuan lawmthu sawiin a tan a.  Hemi zawhah hian  Governor Dr Hari Babu Kambhampati chuan batch hnuhnung ber aṭanga candidate hlawhtlingte hnenah lawmpuiina peiin hawnna thu a sawi chhunzawm a ni. He hun hman zawh hian Governor Dr Hari Babu Kambhampati leh Lady Governor Dr Jayashree Kambhampati te chuan Coaching Centre endik in, zirlaite leh zirtitute an kawm chhunzawm nghal bawk. Vawiin a Coaching hawnna program-ah hian Dr Rohit Srivastava, Director NIEDO leh Axis Bank aiawh te pawh an tel a ni.