991/2024-2025

Aizawl dated 28th June 2024: Vawiin June ni 28, 2023 khan Directorate of Economics & Statistics chuan National Statistics Day vawi 18-na chu Economics & Statistics Conference Hall-ah an hmang. He hun ah hian Dr. Kenneth Chawngliana, Vice- Chairman, Mizoram State Planning Board chu khuallian a ni a. National Statistics Day hi June ni 29-ah hman thin a ni a, kumin ah hian Sawrkar chawlh a nih avangin June ni 28-ah hman a ni.

Pu B. Lalrinhlua, Director, Economics & Statistics chuan programme hi a kaihruai a, Statistics Day hawnna thu tawi leh Statistics Day lo chhuah dan te sawi fiahin, National Statistics Day chu ‘Father of Indian Statistics’ Prof. P.C. Mahalanobis pian champhaphaka hman thin a nih thu te, a chanchin tawi leh India ramin Statistics leh Economics-a hma a sawn theih nana a hnathawh a tarlang.

Khuallian Dr. Kenneth Chawngliana’n kalkhawmte Statistics Day chibai bukin, kumin Statistics Day thupui atan ‘Use of Data for Decision Making’ tih hman a ni chu lawmawm a tih thu a sawi a. Kan tun dinhmun hrechiang tur leh kan hma hun atan a ruahmanna rintlak siam tur chuan Statistics leh Data neih that a ngaih thu a sawi . Tun ah hian Mizoram hmasawnna turin Statistics leh Data dik kan neih theihna atan Village Profile siam tur a inruahman mek a nih thu leh chumi atang chuan khaw tin te mamawh dik tak leh hmalakna atan a ngaih pawimawh hmasak tur tihchianna hmanraw tangkai tak a nih tur thu a sawi.

Khuallian chuan “Sawrkar Policy siam nan hian Statistics leh Data a tangkai em em a, chutiang bawkin chu Policy chu a hlawhtling em tih enlet nan Statistics leh data bawk hi hman tangkai thiam a pawimawh a ni” a ti a. Tunlai khawvel ah mi tin in Mobile Phone kan hum vek a, Information dik leh dik lo pawh awlsam tak a kan dawn zung zung theih tawhna khawvel ah hian – Statistics dik leh Data dik mi te hnen a hriattir zel thei turin thawktute tan la zel turin Khuallian Dr. Kenneth Chawngliana chuan a fuih bawk a ni.

Pu Lalduhsaka, Senior Statistical Officer, Field Operations Division, Ministry of Statistics & Programme Implementation leh Pu H. Lalsawmliana, Principal Scientific Officer hnen atangin Data dik lakkhawm leh hman tangkaina hrang hrang ngaihthlak a ni a. Eco & Stats Director kalchhuak tawh, Pu JC Japanruna, Pu H. Lalchhuanawma leh Pu Lalrikhuma Sailo te hnen atangin thusawi ngaihthlak a ni a. Pi Mary Lalrinchhungi, Joint Director-in lawmthu sawina hun a hmang a ni.

Chawhnu session-ah hian Ministry of Statistics & Programme Implementation-in thupui a rawn thlan ‘Use of Data in Decision- Making’ hmangin seminar neih a ni a, Seminar hi  Pu B. Lalrinhlua, Director-in a kaihruai a ni. Economics & Statistics Officer-ten thupui thlan hmangin Presentation an pe a, sawihona hun te hman a ni.