990/2024-2025

Aizawl, the 28th June, 2024: Sports & Youth Affairs (SYS) Minister Pu Lalnghinglova Hmar,  Aizawl West-II bialtu MLA ni bawk chuan nizan khan Aizawl Dinthar Veng, Local Council leh Branch YMA te'n kum 10 dawn an lo tih tawh thin HSLC leh HSSLC pass tharte lawmpuina Dinthar YMA Hall-a neih chu khuallian niin a hmanpui.

Khuallian Pu Lalnghinglova Hmar chuan Mizo zirlaite hian tun aia nasa zawka lehkha kan zir a tul thu sawiin, "Kan hnam hmalam hun atan zirlaite'n tlansan tur kan ngah a ni" a ti a. Zirlaiah kan hun kan pe tlem a, huau huau leh ruihhlo avanga kan nih tur ang pawh ni pha lo kan tam em a, a bik takin tunlai thangthar zingah inngaihzawnna hian hmun a luah nasa a, zirlai tha tak takte pawh hei hian an dinhmun a pawt hniam zel a ni, a ti a. Zirlaite chu ruihhlo leh a kaihhnawih hrang hrang laka fihlim turin a fuih nghal bawk a. SYS Minister chuan Sports infrastructure tihchangtlun nan Sports & Youth Affairs Department chuan Dinthar Branch YMA hnenah bungrua a pek tur thu a puang nghal a ni.

Khualzahawm Pu R. Thanglura, AMC Dy.Mayor leh Ward XII Corporator chuan tun dinhmun thleng tura Dinthar venga mi inpete'n nasa taka an beih thu sawiin, "Tunah chuan Aizawl veng hrang hrang zingah pawh veng zahpuiawmlo zinga mi kan lo ni ta a. Zanina zirlaite heti zat hlawhtling tharte hian ram, hnam, khawtlang leh chhungkaw tana chhenfakawm ni turin bei sauh sauh ang che u," a ti bawk.

Thusawitu dang Pu R.Lalawmpuia, Dinthar Local Council Chairman chuan, "Zirnaah Dinthar veng kan thangharh mek zel a. Hei hian hmalam hunah beiseina sang min neih tir a ni", a ti a.  Dinthar venga zirna dinhmunte a tarlang bawk.

Pu Lalawmpuia Khiangte, Dinthar Local Council Member kaihhruaiin HSLC leh HSSLC pass zirlai 148 te chawimawina neih niin lawmpuina hlan an ni a. Dinthar High School, Hermon School leh HSLC Top ten zinga lang Lallawmsangi hnenah lawmpuina hlan a ni bawk.

Zirlai tithate lawmpuina inkhawm hi Pu C. Zochhuanawma, Dinthar Branch YMA President-in a kaihruai a. Rev. Chhiarpuia'n hunserh a hmang a ni.