989/2024-2025

Aizawl, 28.06.2024: Vawiin khan Women & Child Development Department buatsaihin Secretariat Conference Hall, MINECO ah State Level Orientation cum Workshop on Mission Shakti leh Beti Bachao Beti Padhao (BBBP) neih a ni. Workshop hawnna inkhawmah Health & Family Welfare Minister Pi Lalrinpuii chu khuallian a ni. Mission Shakti leh Beti Bachao Beti Padhao te hi sorkar laipuiin hmeichhia harsatna tawkte tanpui leh an dinhmun chawikan a, hmeichhe naupang te humhim leh zirna pek a nih theih nana a ruahman a ni.

Khuallian chuan 100 days Awareness Campaign under SANKALP-HEW hawnna hun a nei a. 100 days Awareness hian a tum ber chu Women Schemes hrang hrang kan neihte tangkai zawka mipuiin kan hman theih dan tur te, kan ram leilung humhalh a nih theihna tura thingphun uar te, dan leh hrai in hrilh hriatna kawnga zau zawk a hmalak te leh hmeichhiate dikna chanvo hrang hrang inhrilh hriatna hun hman te a ni.

Health Minister chuan vawiin hun hman a nih chhan chu hmeichhe naupang te chhanhim a, thiam zir tir tur tih kha a nih thu a sawi a. Hetah hian sorkar laipuia Ministry in a beisei angin, department hrang hrang te thawhhona a pawimawh zia hriat tlan leh zual a pawimawh thu te, program ti hlawhtling tura thawhhona tha neih a tul thu a sawi. Health Minister chuan Ministry in min beisei angin, he programme ti hlawhtling tur leh 100-days awareness cum enrollment drive nei turin department tin ten inbuatsaih turin a sawm a. An hna theuh tha taka an thawh chuan, hlawhtlinna tha tak a thlen tur thu a sawi a. Mizoram-ah chuan, state dang a harsatna an tawh ang em em tawk lo mah ila, hmeichhia leh mipa te ang khatah en harsa kan la tih thu Pi Lalrinpuii chuan a sawi a. Kohhran, politics leh khawtlang rorel na ah te, tun hma ai chuan hma kan sawn tawh viau na in, hmasawnna tur erawh kan la ngah hle a ni, a ti a. Chuvang chuan vawiin a thutkhawmna hian Mizoram-ah pawh hmasawna a thlen ngei a beisei thu a sawi.

Mission Shakti hnuaiah hian Mizoramah pawh district pariat ah One Stop Centre te siam niin, hmeichhia thlabar leh harsatna tawkte mikhual nan hman a ni thin a. District thar pathum a OSC hi din turin ruahmanna siam mek a ni. Hemi bakah hian hmeichhia leh naupang ten phone hmanga an harsatna te an thlen theihna tur Helpline siam a ni bawk a. OSC leh Helpline ah hian domestic violence (kawppui/ chenpui te kut tuar) avanga a puihna dil an tam ber a ni. Heng bakah hian Shakti Sadan (Integrated Relief & Rehabilitation Home) leh hamthatna dangte din a ni bawk.

He workshop hawnna inkhawm hi Dr. Renu Sharma, IAS, Chief Secretary, Government of Mizoram chuan Chairman niin a kaihruai a. Mission Shakti hnuaia hmeichhiate humhimna leh tichak tura thawkho tur department hrang hrangte sawiin, thawhho a pawimawh zia leh thawhho dan tur te a sawi a. Line Department te chu School Education Department, Health & Family Welfare, LESDE, Sports and Youth Affairs, District Council & Minority Affairs Dept., Home Department, Rural Development Department, Urban Development & Poverty Alleviation Department leh LAD te an ni.

Pi Zoramthangi Chhangte, Director, WCD chuan kalkhawmte hnenah WCD Department hmalakna, Mission Shakti hnuaia Sub Scheme hrang hrang awmte sawifiahna leh sawi zauna hun a hmang a. Pi Lalzarmawii IAS, Commissioner & Secretary, SWTAW&CD chuan session hmasa zawk hi lawmthu sawiin a khar a. A ni kaihhruaina hnuaiah hian Technical Session neih chhunzawm a ni a. Pi Flora Laltanpuii, Deputy Director (Women) hnen atangin BBBP chungchang sawi hawnna leh inhrilh hriatna bakah an thawhpui Department hrang hrangte hmalakna turte sawi lanna hun a rawn hmang a, chumi hnu-ah Line Department Pariat (8) aiawhin Resource Person thiam tak tak te hnen atangin thusawi (Presentation) ngaihnawm tak tak ngaihthlak a ni a, Presentation hi School Education Department, Health & Family Welfare Department, Labour, Employment, Skill Development & Entrepreneurship Department, Sports & Youth Services Department, Mizoram State Rural Livelihoods Mission, Urban Development & Poverty Alleviation Department leh Science Teacher Association of Mizoram te hnen atangin ngaihthlak a ni.