988/2024-2025

Aizawl 28th June, 2024: Vawiin khan St. Anthony's Higher Secondary School, Chaltlang Lily Veng, Aizawl chuan Vanapa Hall Aizawl-ah Sports Closing Function Cum HSLC & HSSLC Results 2024 Felicitation Programme an hmang a, Pu Vanlalhlana, PWD Minister chuan khuallian niin he hun hi a hmanpui.

Khuallian chuan rim taka an zir rah bakah an nu leh pa leh zirtirtute inpekna rah lawm theia an awm chu lawmawm a tih thu sawiin class 12 pass thar te chu College an kal hunah zalen ta riaua inhriatna a awm duh a, inthlahdah lova a thil tum hrereng chunga taima taka lehkha zir chhunzawm turin a chah a. Kum tam tak rim taka lehkha an lo zir thinna kha a thlawn chantir lo turin a chah. Class X Pass te pawh tum mumal tak nei turin a chah bawk.

Minister chuan khawi ramah mah Sawrkar hna-in a ram mite a daih ngai lova, kan ramchhunga eizawnna kan hmu mai lo a nih pawn kan ram pawnah zawng ngam ila, kan vision tithui a, khawvel hmun hrang hrang explore ngam turin Mizo thalaite chu a chah a. Ruihhlo laka fihlim tur leh natna hlauhawm HIV/AIDS laka fimkhur a, tumruhna leh taimakna, teirei peihna nen bei a, ram, hnam leh khawtlang tana mi tangkai ni turin duhsakna a hlan.

Pu Lalhruaitluanga Chawngte pawhin he hunah hian zirlaite fuihna (Motivational speech) tha tak a sawi bakah Local Council leh MHIP Chaltlang, Lily Veng aiawh atangin thusawi ngaihthlak a ni bawk.

Vawiin hun hi hun hnih, chawhma hun leh chawhnu hunah then niin Award semna, Sport lawmman semna, Runway show down bakah School Man & Lady thlanna te neih a ni a. Zaithiam zai tam tak ngaihthlak a nih bakah lam mawi tak tak thlirho a ni bawk.

St. Anthony's Higher Secondary School-ah hian zirlai 371 leh thawktu 27 an awm mek a ni.