987/2024-2025
2024 Nikir thla ni 28: Lai Autonomous District Council (LADC) huam chhunga village council (VC) 98-a Inthlanpui buatsaihah nimin, June ni 27, 2024 (Ningani) khan tluang taka vote thlak niin, vote thlak zawh fel hnuah vote tlate hi chhiar chhunzawm nghal a ni.

LADC VC Inthlanpui buatsaihah hian ballot paper hmangin zing dar 7-ah vote thlak ṭan niin, tlai dar 5 thlengin vote thlakna hun hawn a ni a. Tlai dar 5-a vote thlak zawh hman lohna hmun ṭhenkhatah chuan vote thlak hun hi pawh sei a ni bawk. Vote thlak zawh fel hnu zan lamah polling station tina vote tlate hi Returning Officer (RO)-te kaihhruaiin polling station hmun ṭheuhvah chhiar nghal niin, chhiar zawh a nih veleh RO-te'n result puangin, thlan tlinte hnenah thlan tlin an nihna lehkha an hlan nghal a. Inthlanna hmanrua leh lehkha pawimawh zawng zawng chin fel a nih hnuah Lawngtlai DC office panpui nghal zel a ni.

LADC-a VC 99 awm zingah 46-Hmawngbuchhuah VC-ah chuan inthlan chuh tura endikna (scrutiny) pal tlang zo an awm loh avangin inthlan buatsaih a ni lo va. VC 98-ah Inthlanpui hi kalpui niin, VC 98-ah hian a duh apiangin an chuh theih general seat 492 leh hmeichhe tana hauh bik reserved seat 98, a zavaiin seat 590 a awm a. Inthlan chuhtu candidate zawng zawng hi mi 1,511 (general seat-ah 1,259 leh reserved seat-ah 252) niin, Bharatiya Janata Party (BJP) candidate 24; Indian National Congress (INC) candidate 300; Mizo National Front (MNF) candidate 438; Zoram People's Movement (ZPM) candidate 549 leh Independent candidate 200 an awm a ni.

29-Saikhawthlir VC-a seat 5 awmah chuhtu 5 (INC 1 leh ZPM 4) awmin, khingtu dang an awm loh avangin inthlan buatsaih ngai lo (uncontested)-a tlinga puan an ni a. 37-Karlui-I, 38-Karlui-II leh 51-Sabualtlang VC-ahte chuan reserved seat-ah chuhtu pakhat ṭheuh (ZPM candidate 2 leh MNF candidate 1) awmin, khingtu awm lo (uncontested)-a tlinga puan an ni bawk a. Inthlan vote thlak hi VC 97-a seat 582 (general 488 leh reserved 94) atan kalpui a ni.

VC 97-a vote awm zawng zawng 55,342 (mipa 27,225 leh hmeichhia 28,117) aṭangin polling station-ah vote 43,211 (mipa 21,336 leh hmeichhia 21,875) a tla a. Postal ballot-a vote tla 288 nena belh khawmin vote 43,499 (78.60%) a tla a ni.

LADC VC Inthlanpui 2024-ah hian ZPM-in seat 246 (general 203 leh reserved 43) lain, VC 38-ah hnehna an chang a; MNF chuan seat 192 (general 162 leh reserved 30) lain, VC 25-ah hnehna an chang a; INC chuan seat 102 (general 89 leh reserved 13) lain, VC 12-ah hnehna an chang a; BJP chuan seat 7 (general vek) lain, VC siamna an nei lo va; Independent candidate-te'n seat 43 (general 31 leh reserved 12) lain, VC khata seat zatve aia tam lakna VC 1 an nei a; party mala VC din thei (majority) awm lohna VC 22 a awm bawk.  

Attachment

  • Loading attachment...