DIRECTORATE OF INFORMATION & PUBLIC RELATIONS, Government of Mizoram, India

986/2024-2025

2024 Nikir thla ni 27: Vawiin, June ni 27, 2024 (Ningani)-a Lai Autonomous District Council (LADC) hnuaia 12-Lawngtlai Chandmary biala Member of District Council (MDC) seat ruak hnawh khah nana by-election buatsaihah tluang takin vote thlak zawh a ni.

Mizoram MLA Inthlanpui, 2023-ah Lawngtlai East bial aṭanga thlan tlin a nih avangin, bialtu MDC ni lai Dr Lorrain Lalpekliana Chinzah chuan Lawngtlai Chandmary bial MDC seat hi chhuahsanin, he seat ruak hnawh khah nan hian by-election hi buatsaih a ni a. Lawngtlai Chandmary MDC bial chhunga polling station pali - Lawngtlai Chandmary North-I, Lawngtlai Chandmary North-II, Lawngtlai Chandmary South-I leh Lawngtlai Chandmary South-II-ahte by-election vote thlak hi kalpui a ni a. Inthlan chuhtu candidate mi pathum (Pu F. Hrangtukhuma, ZPM; Pu K. Lalawmpuia, BJP leh Pu C. Lalsawmzuala, MNF) an awm a ni.

Lawngtlai Chandmary bial MDC by-election-ah hian Electronic Voting Machine (EVM) hmangin zing dar 7-ah vote thlak ṭan ni niin, tlai dar 5 thlengin vote thlak hun hawn a ni a. Vote awm zawng zawng 2,798 (mipa 1,313 leh hmeichhia 1,485) aṭangin EVM-ah vote 2,013 (mipa 936 leh hmeichhia 1,077) a tla a. Postal ballot-a vote tla 47 nena belh khawmin vote 2,060 (73.62%) a tla a ni.

Lawngtlai Chandmary bial MDC by-election-a vote tlate hi July ni 1, 2024 (Thawhṭanni) chawhma dar 10-ah chhiar a ni ang.

Attachment