108/2024-2025 

Champhai, the 9th April, 2024: Vawiin chawhma dar 11:00 khan DRDA Governing Body Champhai thutkhawm hnuhnung ber chu an Chairman Pu James Lalrinchhana, District Bawrhsap kaihhruaiin DC Conference Hall-ah an thukhawm. Thukhawm chuan District Rural Development Agency (DRDA) Champhai thiah a remti a, District Rural Development Office (DRDO) Champhai ti a kalpui a ni ang.

He hun kaihruaitu DRDA Governing Body Champhai Chairman Pu James Lalrinchhana chuan meeting ngaipawimawha tel zawng zawngte chungah lawmthu a sawi a. DRDA Governing Body Champhai din a nih dan leh kalphungte a sawifiah a. Member Secretary Pu Lalrinawma, PD, DRDO Champhaiin meeting koh chhan sawifiahin DRDA Champhai hnuaia hmunhma leh bungraw neihte pawh sawrkarah report fel a nih tawh thu a sawi bawk.

Meeting-ah hian District Rural Development Agency (DRDA) Champhai thiah chungchang ngaihtuahho a ni a. Ngun taka sawiho a nih hnuah DRDA Governing Body Champhai thukhawm chuan DRDA Champhai thiah a remti a, District Rural Development Office (DRDO) Champhai ti a kalpui a ni tawh dawn a. Agency ni tawh lovin Department Office anga kalpui a ni dawn a, hmunhma leh bungrua neih ang angte pawh State sawrkar Rural Development Department kutah a awm tawh dawn a, a enkawlzui leh tul dangte pawh a ngaihtuah tawh dawn a ni.

Thukhawm chuan hun rei tawh tak atanga DRDA Champhaiin thingtlang hmasawnna a lo thawh tawhnaah lawmthu a sawi a. Member-te chuan Rural Development lama hmasawnna tur a nih avanga DRDA thiah chu an remtih thu leh Agency ni tawh lova Office anga changtlung taka a function tawh tur chu an lawmpui thu an sawi a. Awmze nei leh changtlung zawka kalpui a nih theih nana inbengvar tawn zel a tul dawn thu meeting-ah hian tarlan a ni bawk.

DRDA Governing Body Champhai thutkhawmah  hian Champhai North bialtu MLA Er. H. Ginzalala, Adviser to CM (Technical), East Tuipui bialtu MLA Pu Ramthanmawia, Mizoram Khadi & Village Industries Board (MKVIB) Chairman Pu C.Lalremliana leh member dangte an tel a ni.