Dated Khawzawl the 9th July, 2021: District Rural Development Agency (DRDA), Khawzawl District hnuaia Centrally Sponsored Schemes (CSS) hrang hrang kalpui a nih dan thlirletna, First Quarter Review Meeting chu nimin chawhnu khan khan Pu Zothanmawia, Deputy Commissioner, Khawzawl District kaihruaiin DC Conference Hall ah neih a ni.

Khawzawl District Bawrhsap chuan Khawzawl District-ah inkalpawhna leh inbiakpawhna a that thu sawiin, sawrkar laipui kaltlanga hmasawnna hnathawh Centrally Sponsored Schemes kalpuinaa tehna hrang hrangah Mizoram District 11 zinga titha ber nih tum ngei turin DRDA Khawzawl District hnuaia thawktute chu a fuih a ni.

Nimin meeting hi April ni 1, 2021 a DRDA, Khawzawl District din a nih atanga Quarterly Review Meeting neih hmasak ber a ni a. CSS hrang hrang, Mahatma Gandhi National Rural Employment Guarantee Act (MGNREGA), Pradhan Mantri Awaas Yojana-Grameen (PMAY-G), Mizoram State Rural Livelihood Mission (MzSRLM), Shyama Prasad Murkherjee Rurban Mission (SPMRM) leh Integrated Watershed Management Programme (IWMP) hnuaia Khawzawl District-a sawrkar hmalaknate thlirho a ni.

He huna tarlan a nih dan chuan Mahatma Gandhi NREGA hnuaiah Khawzawl District-ah Job card nei chhungkaw 8441 awm mekin, Job card leh Aadhaar thlunzawm tawh hi 7997 a tling a, hei hi za zelah 94.74 a tling a ni. Aadhaar leh Job card la thlunzawm lohte chu DC, Khawzawl hnuaia Aadhaar Operator-te nen tanghoin September, 2021 ral hma a Aadhaar number siamsak a thlunzawm hman vek tura hmalak nise tih a ni. Kum 2021-2022  financial year ah Mahatma Gandhi NREGA hnuaiah Job Card holder-te tan ni 34 inhlawhna (April-ah ni 14, May-ah 14 leh June-ah 6) te siamsak tawh a ni a, heng mipui inhlawhna atan hian hna 353 thawh tawh niin, Job card holder-te hlawh Rs. 6,68,57,486/- (Cheng vaibelchhe ruk, nuai sawmruk pariat, sing nga sangsarih zali sawmriat paruk) hi an bank account-ah e-FMS hmanga thun sak vek an ni. Mahatma Gandhi NREGA hnuaia Job Card holder-te hlawh chu za ah za a hun takah an account-ah thun vek a ni tih tarlan a ni a, July 2021 hian ni 6 inhlawhna siam leh tum mek a nih thu meeting-ah hian tarlan a ni bawk.

Jal Shakti Abhiyan Catch the Rain campaign kal mekah ruahtui khawlna tur leh tuihna humhalhna lam hawi hna chi hrang hrang 49 thawh tawh a ni a. Khawzawl District chhunga tuihna awmna hmun (water bodies) te chu GIS hmanga mapping tih zawh tawh a ni. District huamchhung khaw pariat- Biate, Chawngtlai, Tualte, Neihdawn, Rabung, Khualen, Sialhawk leh Arro-ah te Geographical Information System (GIS) hmanga plan siam fel tawh niin, GIS plan ang zela hna thawh mek a ni bawk. Khawzawl District chhunga khua zawng zawngte chu December 2021 hmaa GIS hmanga plan siam hman vek tum a ni.

Pradhan Mantri Awaas Yojana-Grameen (PMAY-G) hnuaiah Khawzawl District-a mi 52 chuan insak tanpuina dawngin, heng mite hian in pawh an sa zo vek tawh a, mi pakhat chauhin final installment a la dawng lo a ni. Sawrkar laipuiin insak tanpuina dawng thar tur Awaas+ software kaltlanga a rawn pek leh turah Khawzawl District atangin mi 357 an awm tur thu tarlan a ni bawk.

Mizoram State Rural Livelihood Mission (MzSRLM) hi Khawzawl District chhunga khaw 25 ah kalpui mek a ni a. MzSRLM hnuaiah hian Self Help Group (SHG) 364 awmin member zawng zawng zat hi 3085 a ni. SHG te hi Village Organisation (VO) 25 ah an in thlungkhawm tih tarlan a ni bawk. Khawzawl District-a SHG 348 te hnenah revolving fund pek tawh zawng zawng hi Rs. 50,80,000/- a tling tawh a. SHG 300 te hnenah Community Investment Fund (CIF) Rs. 3,30,00,000/- pek a ni tawh bawk. SHG te hian Covid-19 dona atan hmaituamna 4000 thuiin an sem chhuah tawh bakah damdawiin leh VLTF te hman tur PPE 60 an siam sak bawk a ni. MzSRLM hnuaiah hian financial inclusion pawh nasa taka kalpui mek niin, tun dinhmunah Banking Correspondent 'Sakhi' mi 17 an awm a, loan pek chhuah tawh zat hi cheng nuai 244.6 a tling tawh a ni.

Shyama Prasad Murkherjee Rurban Mission (SPMRM) ah hian Khawzawl Rurban Cluster-ah khaw 13 (sawmpathum) -Arro,Hmuncheng,Tualpui,Ngaizawl,Neihdawn, Khualen, Tuipui, Tualte, Chawngtlai, Vankal, Puilo, Chhawrtui leh Kawlkulh te an awm a. SPMRM hnuaiah hian kumin chhungin State sawrkar atangin 3rd installment-ah cheng nuai 139.22 leh 4th installment-ah cheng nuai 56.3 hmuh a ni tawh a, hemi hmang hian hna hrang hrang heng market shed, agriculture link road, solar street light, water tanky, retaining wall, side drain leh adangte chu Central schemes dangte nen tangrual (convergence) a thawh a ni.

IWMP hnuaiah Champhai III Project chu kum 2011-2012 atanga thawh tan a ni a. Project Area hi 5000 Hectare lai niin, project cost hi cheng nuai 700 a ni. He project hnuaia Watershed area hian khaw panga- Khawzawl, Ngaizawl, Neihdawn, Tuipui leh Tualpui te a huam a. Tun dinhmunah he project hi thawh zawh tawh niin, hun reilote chhunga tihtawp tura ruahman mek a nih thu tarlan a ni bawk.

Meeting-ah hian Pu Lalrohlua, Project Director, DRDA leh Dr. Saithangpuia,
Block Development Officer, Khawzawl RD Block-te bakah DRDA leh RD Block atanga Officer leh Staff-te an tel a ni.