No.1333/2021-2022

Aizawl, the 10thJuly 2021 : Vawiin khan Agriculture Minister Pu C. Lalrinsanga’n Johnson Diesel Sales & Services Depot, Sihhmui atangin Mizoram hmun hrang hranga loneituten’a Custom Hiring Centre kaltlanga an huan, lo leh leiletah te an inhmantawm thei tur tractor, power tiller, mini power tiller leh khawl chi dang hrang hrang a vailiam.

Hemi puala programme tawite neihah Agriculture Minister Pu C. Lalrinsanga chuan COVID hripui leng karah Sawrkar leh Department chuan loneitute kawng hrang hranga dawmkan, chawhphur leh fuih tumin hma an lak mek thu a sawi a, chung zinga pawimawh tak chu an thlawhhma leh leilette awlsam tak leh awmze nei zawka khawl hmanga an buatsaih leh an enkawl theih nana khawl hrang hrangte ngaihtuahsak a ni tiin vawiin programme chu chumi kawnga bultanna pawimawh tak a nih thu a sawi.

Minister chuan khawl tam zawk chu zauah loneituten an inhmantawm tur angin ruahman a ni tiin hengte hi mimal ta, neih zawnga tih chi a ni lova, Custom Hiring Centre a khawl te chu a nihna ang taka an tharchhuah tihpun kawnga hmang tangkai turin a chah a. Sawrkar in heng khawl man te hi za zelah 95 a tum avangin an hman tangkai loh leh an hluihhlawn mai chuan a la let thei tiin loneitute leh beneficiary te chu khawl te hi sal anga chhawra, fa tlum anga duat turin a fuih a ni.

Agriculture Minister chuan zau hrang hrang a thlawhhma neite chu intelkhawm a awmzei nei zawka khawl hmanga hlawk zawka lo neih dan organised farming anga kal a pawimawh thu sawiin Sawrkar chuan hemi atana Farmer Producer Organization (FPO) kaltlanga hmalak a tuma, chumi atana dan hrang hrang siam ngaite chu Department in an buaipui mek tih a sawi a. Tunhnaia ramri hrula loneitute thlai Assam Sawrkarin a tihchhiat leh an suam chu a dem takzet tiin ramri depa loneitute mamawh ang ang chu Sawrkarin pek zel a tum thu a sawi tel bawk a ni.

He hun hmanpuitu dang Agricultural Development Board Vice Chairman leh MLA ni bawk Pu H. Biakzaua pawhin thu sawiin ram intodelhna chu loneitu leh kuthnatawktute kutah a innghat a, khawl te hi tangkai taka tharchhuah tihpun nan hmang turin beneficiary te a fuih a ni. Programme hi Agriculture Secretary Pu J. Hmingthanmawia, IAS in kaihruaiin he Scheme chungchang leh khawl chungchangte hi Pu Lalchhanliana, EE, Agriculture Department in technical report a sawiah a tarlang a. Agriculture Director Pu Rohmingthanga Colney, Agriculture Development Board Member te leh beneficiary te an tel a ni.

Vawiin khawl hrang hrang vailiam hi Central Sawrkarin in (90:10) a Sub-Mission on Agricultural Mechanization (SMAM) hnuai a ruahman niin a bultanna a ni a. He Scheme atan hian kum 2020-21 chhungin nuai 954.89 dawn a ni a. He sum hmang hian Department chuan loneituten an lo, huan leh leiletah an hman tur khawl chi hrang hrang an leina turin SMAM hnuaia subsidy pek theih ang zelin pekchhuah a tum a. Chungte chu - Custom Hiring Centre hrang hrang atan Tractor 52 leh a kaihhnawih bungrua te; buh sengna khawl paddy thresher 40; leilehna khawl power tiller 150; mini power tiller 100; hnim samfaina khawl brush cutter 400; Knapsack Sprayer 100; leilehna khawl vir theih Rotavator 20; fu herna khawl 75 leh kurtai chhuana bel lian 85 te an ni.

Kum 2013-14 atanga 2021-21 thleng, Department in loneitute tan subsidy in Power Tiller 1110 leh Mini Power Tiller 354 an pechhuak tawh a. Kum 2013-14 atangin loneituten khawl inhmantawn theihna Custom Hiring Centre 181 din tawh niin tun tumah hian CHC 52 te tana khawl pekchhuah tum niin hma alo lak tawh nen avaiin CHC 233 a tling tawh dawn a ni. Heng Custom Hiring Centre ah te khawl man to bik Tractor te, lei lehna hmarua te leh buhsengkhawl te, za zelah 95 subsidy in pek thin a ni.