Vawiin khan Pu Lal Thanzara, Bialtu MLA leh Parliamentary Secretary ni bawk chuan Hunthar Middle School-ah Hunthar Drivers Association (HDA) Annual Assembly vawi 19-na a hman pui.

Pu Lal Thanzara chuan Hunthar Drivers Association chu driver-te insuihkhawmna mai bakah, vengchhung hmasawnna atana hmalak tumna thinlung pua din a ni chu fakawm a tih thu sawiin, a din tirh atanga tluang taka a kal chho zel chu lawmawm a tih thu a sawi a. Driver-te chu hna zahawm thawktu an ni tih sawiin, he an zahawmna kenkawh chu an kuta innghat a nih thu a sawi a, an passenger-te leh bungraw phurh te himna an kutah a awm tih hre nawn fo turin a chah bawk. Driver-te chu Mizoram rawn tlawhtu khualzin mite tana kan ram hmel lanna an ni tih sawiin, an hawiher leh chetzia chuan hnamdangte min thlir dan leh kan chunga an rilru put dan tur a hril hle a ni, a ti a; hawihhawmna leh insumtheihna te chawi nung zel a, fimkhurna leh rinawmna nen, mipuite tana thlamuanthlak taka an hna thawk zel turin a fuih bawk.

Ram hmasawnna atana inkalpawhna tha nei turin Sorkar chuan kawng tha leh zau zawk a siam mek zel a ni, a ti a, furpui kan ramin a tawrh mekah Driver-ten an thahnemngaihna leh sorkar an thawhpuinaah lawmthu a sawi bawk. Hunthar veng tana sorkar hmalakna hrang hrangte pawh tarlangin, thlanmual panna kawng black top tur pawh hna tan thuai a nih tur thu a sawi a, Pu Lal Thanzara hian Hunthar Drivers Association hnenah cheng singthum (Rs. 30,000/-) a hlan a ni.

He hun hi Pu Lalzawmliana Sailo, President HDA chuan kaihruaiin, Pu Chanchinmawia, Secretary hnen atangin Report ngaihthlak a ni a, an member chatuan ram pan ta mi paruk te sunna hun hman niin, Pu Kapliana, Treasurer chuan lawmthu sawiin hun a khar a ni.

Hunthar Drivers Association (HDA) hi ni 2 October, kum 1994-a din niin, tunah hian member 47 an awm mek a ni.