Ni hnih awh tur Bio-Medical Waste Management chungchanga Training vawiin atanga I &PR Conference Hall-a tan chu Minister, Health & Family Welfare, Pu Lalrinliana Sailo in a hawng. Training hi Pu C. Lalduhawma, Member Secretary, Mizoram State Pollution Control Board-in a kaihruai a. Aizawl Civil Hospital; Presbyterian Hospital, Durtlang; Private Hospital hrang hrang leh Aizawl khawchhunga Pathological Laboratory atangin training te hi an kalkhawm a ni.
He Training hawnnaah hian Health Minister chuan Damdawiin bawlhhlawh sawngbawl leh thehthang dan tura dan awmte ngaihpawimawh a tul thu leh Health Care atan pawh Rs vaibelchhe 150 a awm thu te, Health Care bik hi tihchangtlun chhoh a nih tur thu leh Private Hospital te pawh an bawlhhlawh sawngbawl leh thehthang dan chungchangah dan zawm tura khirh zawka kal chhoh pui a nih tur thu a sawi. Falkawn Referral Hospital pawh tihchangtlun chhoh a nih tur thu Minister hian sawiin damdawiin bawlhhlawh sawngbawl leh thehthang danah hian dan ang taka kal chhoh pui a nih tur thu a sawi bawk. Health Minister hian Damdawiin hrang hranga a hnarkaitu kalkhawmte chu Damdawiin Bawhhlawh sawngbawl leh thehthang hi a pawimawh em avangin thla thum danah thawktute inzirtir thar reng turin a chah bawk. He hun hi Dr Lalrinliana Sailo, Principal Director, Health & Family Welfare Department leh Pu R.C Thanga, Chairman, Mizoram State Pollution Control Board te’n hmanpuiin, thu an sawi bawk.
He Training-ah hian damdawiin bawlhhlawh sawngbawl dan leh thehthang dan bakah danin a phut thil chi hrang hrangte zir hona neih tur a ni a. Aizawl khawpui chhunga Hospital leh Pathological Laboratory atangin a hnarkai tu leh mi pawimawh tak tak te an tel a. Mizoram State Pollution Control Board leh Central Pollution Control Board-a mithiam te’n zirtirna hi an pe ang.
Damdawiin bawlhhlawh te hian natna hrik hlauhawm tak tak a pai theih avangin mihring hriselna atana hlauhawm a Bio- Medical Wastes (Management & Handling Rules) 1998 in a sawi angin uluk tak a thehthang tur a ni a. He mi chungchangah hian Mizoram State Pollution Control Board chu Prescribed Authority niin, an ni hian damdawiin ‘ PHC, CHC, Nursing Home, Veterinary Institution leh Pathological Laboratory-te bawlhhlawh sawngbawl dan enfiah tur leh, dan an zawm loh chuan Supreme Court Monitoring Committee zahawm takin a kawhmuh angin,an chunga dan lekkhawh tura thu neihna pek an ni.
Damdawiin bawlhhlawh reng reng hi chi hrang 10-ah then a ni a. A hlauhawm dan a zirin fimkhur taka dah hran a, sawngbawl hmasak ngai chite sawngbawl a. Fel fai tak a theh thang tur a ni.Tin, Damdawiin leh Pathological Laboratory reng reng hian Mizoram State Pollution Control Board-ah phalna an la vek tur a ni a , Damdawiin thuneituten Bio- Medical Waste (Management & Handling Rules) 1998 hnuaia dan awm te a kip a kawiin a zawm vek tur a ni.
