Vawiin khan Mizoram State Sports Council(MSSC) Executive Committee chu an President, Pu Zodintluanga, Sports & Youth Services Minister hovin a pisaah an thukhawm.
He meeting-ah hian thu pawimawh tak tak an rel a; MSSC hnuaia infiamna hmunhma (infrastructure) hna thawhte lo enpui turin Sub-Committee peng pakhat, Monitoring Cell din niin, member turte ruat nghal an ni a; thawktu pension vanga hna ruak awmte leh Sorkarin infiamna hrang hranga hmasawnna hna chak taka a kalpui mekna kawngah, Technical Section indaihlohna phuhru tura thawktu lakbelh chungchang pawh Selection Committee ngaihtuah tura dah a ni. He hunah hian ni 25.4.2013-a Executive Committee Meeting thurelte ennawnna hun hman a ni bawk.
Meeting-ah hian Minister Pu Zodintluanga chuan kum nga dawn Sports Department-a enkawl chhungin Sports Directorate leh Mizoram State Sports Council officer leh hnathawktute zawng zawng bakah, Sports association hrang hrangten thahnemngai taka Sorkar an tawiawmna avangin lawmthu a sawi a, hei hian hmasawnna rah tha tak a chhuah a ni, a ti.
Vawiin meeting tan tirh hian Pu Zodintluanga chuan Mizoram State Sports Council Official Bulletin hmasaber “THANGCHHUAH” chu mipuite chhiar turin a tlangzarh a, Sports Department hmalakna hrang hrang leh chanchin thar te bakah Sports lama mi langsarte chanchin leh article chhiar nuam tak takte tarlan a ni dawn a ni. Thangchhuah Bulletin hi thla thum dana chhuak tur niin, full colour print a ni a, mipuite leh infiamna khawvela inhmang te tan a tangkai hle beisei a ni.
