Kolasib a Road Safety Week hmanna kal zelah Kolasib Town area huamchhunga Taxi leh Auto rickshaw khalhtu te tan vawiin khan I&PR Conference Hall-ah Training buatsaih a ni.

Training hi Pu R.Lalnunmawia, DTO in a kaihruai a. He hunah hian dan leh hrai bakah nungchang mawi inzirtirna hun hman a ni a, dan zawm loh leh fimkhur tawk lohna avanga chetsualna a thlen fo avangin, kalkhawmte fimkhur taka lirthei khalh thin tur leh dan pawisa tur a chah an ni a. Dan zawm lo te driving license laksak leh jail tan tir thlenga hrem theih an nih dan te tarlan a ni a. Motor Vehicle Acts leh Rules chungchangah Pu Lalrindika Vanchhawng, MVI in zirtirna pe in, Traffic Rules Pu Lalpiansanga, ASI in a zirtir a. Driver te tana nunchang mawi leh hawihawmna chungchangah Pu H.Vanlalnghaka, President, MJA Kolasib-in zirtirna a pe a. Heng bakah hian Cigarette and other Tobacco Products Act chungchang inzirtirna neih a ni bawk a, Pi Lalremruati, Medical Officer, Anti Tobacco Cell in zirtirna a pe a ni.

Vawiin Training buatsaihah hian taxi leh autorickshaw khalhtu 170 chuang an kalkhawm a, hun hlawkthlak tak an hmang a ni. Zan lamah Kolasib Town Area chhunga Maxi cab driver te tan training hi buatsaih leh ani anga, dan leh hrai hrang hrang bakah AIDS chungchang inzirtirna neih a ni ang.