Vawiin chawhma khan Lunglei DC Conference Hall-ah Aadhar chungchanga District Level Committee din chu Lunglei DC Pu K. Lalrohlua kaihhruaiin a vawikhatna atan an thukhawm.

Pu K. Lalrohlua chuan Centrally Sponsored Scheme (CSS) te chu sawrkar kum thar atangin Direct Benefit Transfer (DBT) hmanga kalpui vek an nih tawh dawn avangin sawrkar chuan Aadhar enrolment a ngaipawimawh hle a ti a. Member-te mahni Department hnuaia CSS kalpui mek nei te chu February thla tawp hmaa hriattir theuh turin a ngen nghal a ni. Gas lamah a takin kan hmang chho tawh a, scheme dangah kan hman chhoh leh dawn avangin sawrkar, tlawmngaipawl leh bank hnathawk te kan nihna angin a pawimawhna mipui kan finchhuah a ngai a ni, a ti a.  Sawrkar leh bank te inkara thawhhona tha neih tul a tih thu a sawi bawk a ni.

Nodal Officer Pi Josephine Zonunsangi, SDC chuan Lunglei District-a Aadhar enrolment kalpui dan report a pe a. Kum 2015 thleng khan Lungleiah mihring 1,79,742 awm anga chhut a ni a, February ni 3, 2017 thleng khan mi 90,051 te chuan enrolment ti tawh in, 50.10% te’n Aadhar enrolment an ti tawh a ni. Lunglei District chhungah Enrolment Centre 6 awm in, Block pali ah pakhat theuh dah a nih bakah Lunglei khawpui chhungah pahnih dah a ni. Heng Enrolment Centre te hi activated operator 20 te’n an enkawl mek a ni.

Meeting-ah hian enrolment-a harsatna a tlem zawk nan document hrang hranga hming ziah dan chungchangah mipui fimkhur lehzual tura in zirtir tha an tih thu an sawi a. Heng document a tih dik ngai nei te chuan document dik kengin Voter ID-ah Election Branch, DC Office; Ration Card-ah DCSO leh Aadhar Card-ah e-District Office ah te an buaipui theih thu tarlan a ni bawk.

Sawrkar laipuia Ministry 74-te chuan Scheme 1089 an kalpui mek a, chung zinga Ministry 58-te chuan DBT hman ngaihna Scheme 465 an kalpui mek a ni. Mizoramah pawh heng Scheme 465 atangte hian engemaw zat chu kalpui mek a ni.