‘Fish for All’ tih thupui hmanga Mizoram Fish Festival - 2017 ni 2-na chu vawiin khan I & PR Auditorium-ah Dr. B.D Chakma, Minister of Fisheries, Mizoram hovin hman a ni a. Vawiin atana thupui thlan bik ‘Development of Fisheries,Conservation and Propagation of Indigenous Fish Species of Mizoram’ chungchang zirbing in Symposium neih a ni a. Department a thawktute bakah Pachhunga University College a Zoologies zirlai leh sawmbikte nen vawiin programme hi hman ho a ni.
Sangha-te hi mihring nunna atana pawimawh tak leh sangha khawi te pawh eizawnna tha tak a nih mai piah lamah mihring hriselna atana protein tha tak tak hi sangha ah a awm a. Sangha ei tam chu an thluak a tha an lo tih thin ang in sangha hi kan taksa tan thil tha tak leh hlu tak a nih thu khuallian Dr. B.D. Chakma chuan a sawi a. Mihring kan lo pun zelna ah eitur mamawhna pawh a sang veleh zel a. Chu mamawhna chu umpha turin theih tawkin nungcha leh thing leh mau te humhalhna rilru pu chung zelin hma kan lak chhoh a ngaih thu leh he mi kawngah hian Science background a pawimawh hle tiin sangha te khawi leh pun zelna atan leilung pianken malsawmna kan dawnte humhalh in boruak thianghlim leh tha te nei tura thing leh mau leh nungchate an lo pun zel dan tur tinzawn reng a ngaih thu a sawi.
Mizoram chungchang bik Fisheries Minister chuan sawiin Mizoram ah hian sangha khawina hmun atan 24,000 Ha neih a nih laiin 4850 Ha vel chauh hi hman tangkai a la ni in Mizorama sangha zawrhchhuah dan pawh hi a la hniam hle a,heta tang hian sangha khawi lamah tan lak nasat a ngai hle ani tih a hriattheih a, tan lak tak tak a tul hle tawh ani a ti a. Kan suangtuahna te ti hlawhtling tur leh hnianghnara sangha intodelh theihna turin vawiina Symposium a tel zawng zawngte chu rilru leh thluak sawrbinga ngaihtuahna te hmang tha tur leh sawihona te pawh hmang tangkai ngei turin Minister chuan duhsakna a hlan a ni.
Pu S P Singh, Fisheries Director chuan vawiin programme hi a kaihhruai a.Sangha chi hrang hrang chanchin zirho leh sawi ho a ni a. He hun hmanpui tur hian state pawn atanga lo kal heng a hnuai a mite hian zirtirna an pe .
Dr. Sanjay Sharma, NFDP, Guwahati; Prof. Devasiskar, Assam University; Dr. Dandhar Sharma, Associate Professor,Zoology, Guwahati University; Dr. Derek Desuza, National Angling Federation leh mithiam tak takte an local a. Mizoram atang pawhin Dr. O.P. Singh, Managing Director, ZOFISFED leh Dr. Lalramliana, PUC ten thu an sawi bawk a. Pu Lalhmangaiha, Dy. Director of Fisheries in hun tawpah lawmthu a sawi a ni.
He Fish Festival denchhen hian KVI, Sericiulture, Agriculture, ZOFISFED leh Angler Association,Mizoram Aquarium Association leh midang ten sangha chi hrang hrang Transport Department bulding Vanapa Hall bulah mantlawm zawkin naktuk 10.2.2017 thleng an zuar ang.
