Vawiin chawhnu khan Excise & Narcotics Minister Dr. K. Beichhua chuan Rangvamualah Excise & Narcotics outpost thar a hawng.

Minister Dr.K. Beichhua chuan thu sawiin kan ram dinhmun ngaihtuahin ruihhlo leh zu vangin thalaite an boral nasa a, khawtlang a buai bakah kohhran thlengin an tuar a ni, a ti a. Heng ngaihtuah chung hian sawrkar chuan ruihhlo leh zu do beihpui a thlak mek zel a ni, a ti a. Kan ram dinhmun en hian HIV/AIDS vei tamna ram kan ni a, hmeithai tamna state kan ni bawk a, sawrkarin ruihhlo leh zu do a ngai pawimawh ang hian mipuite pawhin ngai pawimawh tlang ang u, a ti a. Dan mumal tak siama zu tihtawp tum a nih tur thu a tarlang a. Rangvamual hi kan ram kawtchhuah a ni a, zin veivak mite pawhin ram an teh hian kawtchhuah atang hian a ni thin a, kan khawtlang nun leh mizia a hriat theih nghal thin a ni tiin helai veng hi zu leh ruihhlo dona kawnga hmasawn tur chuan khawtlang hruaitute an pawimawh hle a ni, a ti a. Kan ram tichhe mektu ruihhlo hi do tlang ang u tiin kalkhawmte a chah a. Zu leh ruihhlo tihtawpna atana outpost hawn a ni chu lawmawm a tih thu a sawi a ni.

CYMA Vice President Pu R. Lalngheta chuan thu sawiin outpost thar hi ruahmanna tha tak a ni tiin khawtlang pawhin rilru thar nena hmalam kan pan a ngai a ni, a ti. 

Programme hi Excise & Narcotics Commissioner & Secretary Pu K.T.Beicho, IRAS chuan a kaihruai a. Commissioner of Excise & Narcotics Pu Ngurchungnunga Sailo chuan lawmthu sawina in a khar a. Excise & Narcotics hotute leh hnathawkte, CYMA leh khawtlang hruaitute an tel a ni.

Outpost tharah hian Excise & Narcotics Aizawl District office atangin duty awm thin tura ruahman niin officer pakhat leh staff an awm dawn a. 24X7 chhung duty awm tura ruahman a ni.