Vawiin khan Lunglei DC Conference Hall-ah Tripura Bru Relief Camp  atanga Lunglei District a Bru chhungkaw 364 hruai kir dan tur ngaituahin District Level Core Committee an thukhawm. Thutkhawmna ah hian  Pu Benjamin Lalzama,Addl. DC Lunglei, Pu Lalchhuanthanga, Addl. SP, Lunglei  bakah  a kaihhnawih sawrkar Department hotute leh Sub Hqrs YMA hruaitute an tel.

Sawrkar laipui, Mizoram Sawrkar, Tripura Sawrkar leh Mizoram Bru Displaced Peoples Forum te chuan Draft Agreement an siam angin March ni 31st, 2019 chhungin   Tripura Relief Camp atangin Mizoram atangin l aklet tur an ni .  Bru chhungkaw 364 Lunlei District ah  laklet tur an ni a. Hruaikir hna thawk tur hian LO leh AO engemawzat ruat an ni. Lunglei District ah hian Bru chhungkaw 364 hruai kir tur in Khakchangpara camp atangin chhungkaw pahnih (2) te chu 4th March 2019 ah , Hamsapara Camp atangin chhungkaw 1 chu 6th March 2019 ah , Naisingpara Camp atangin chhungkaw 63 te chu 8th - 9th March 2019 ah leh Hazacherra camp atangin chhungkaw 298 te chu 11th - 13th March 2019 ah lak let tur a tih an ni. Heng chhungkaw 364 te hi Lunglei District huam chhunga khaw pali- Putlungasih, Chawilung S, Dinthar leh Buknuam ah hruaikir an ni ang. Vawiin meeting-ah hian Relief Camp atanga Lunglei District an rawn pan kawnga motor ruahman dan tur, an ei leh in tur, tui in tur, inthiarna leh Medical facilities leh security arrangement te chipchiar taka sawiho a ni a. Department hrang hrangte sum mawmawh te, kawng dinhmun, kawlphetha dinhmun, damdawi leh medical facility dang mamawh tur te, buhfai lama ruahmanna siam te leh Sawrkar official-te duty dan tur sawiho a ni bawk.  Pu Benjamin Lalzama chuan Bru hruai kir hna hi Mizoram sawrkar Home Department –in Road Map a buatsaih angin uluk taka kalpui a nih tur thu sawiin he hna hi hlawhtling taka zawhfel a nih theihnan kalkhawmte te chu theihtawp chhuah theuh turin a chah a ni.