Vawiin khan Kolasib Venglai Bazar ah Agriculture Department bul tumin , ni khat awh tur Paramparaghat krishi vikas yojana (PKVY ) Organic fair buatsaih a ni.

He huna khuallian Kolasib Bawrhsap Dr.Arun T,IAS chuan tunlai khawvel changkang leh thang chho mek zel ah mihringte chuan ei leh in kan duh tuiin kan uluk chho tan tawh a, thianghlim taka thlai thar chhuah te hi hriselna a tana thil pawimawh tak ani a, a thar chhuah bakah heng thlai ei te hi kan intihhmuh nasat a hun tawh a ni a ti. India ram Prime Minister hmasa ber Jawahar lal Nehru a chuan “hmasawnna hna kal lai mek eng pawh hi tawp hun nei thei a ni a, Agriculture erawh chu engtikah mah a tawp thiang ve lo” tia a sawi chuan vawiin ni thlengin mihring nitin khawsakna a Agriculture pawimawh zia a nem nghet a ni tiin thlai thianghlim thar chhuahna kawngah Cluster Model Development, Training leh Certification te chu a pawimawh thu kalkhawm te hma ah a sawi a ni.

Khual zahawm Pu Rohmingthanga Colney, Director (CH), Agriculture Dept.  chuan Organic fair buatsaih thei a ni thu thil lawmawm tak ani tiin tlangram lo neih dan ti danglam lutuk chuang loin chemical fertilizer hman tlem telh telh a thlai thar chhuah chu paramparaghat krishi vikas yojana thil tum pakhat  ani tiin thianghlim taka thlai tharchhuah te chu hriselna a tana thil pawimawh tak a nih avangin zau thei ang bera kan intihhmuh a ngai a ni a ti.

PKVY hi Prime Minister Narendra Modi chuan kum 2015 khan a tlangzarh a, he Scheme ina a tum ber chu kuthnathawkte chu cluster a intelkhawm tir in hrisel zawka thlai thar chhuah tir (Organic farming Methods) a ni a, he Scheme a inziak lut chuan cluster pakhat ah kuthnathawk/farmer 50 tal an awm a ngai a, farmer tin hian Organic seed lei nan bakah thlai thar deuh chhuah leh bazaar a phur luh nan cheng 20,000/- theuh an dawng thin a ni. Tun dinhmunah Mizoramah hian Cluster 34 awmin heng cluster 34 hnuaiah hian kuthnathawk/Farmer 1700 an in ziak lut  a, Kolasib District ah hian Cluster panga (5) awmin chung te chu Zau Au (Lungdai), Tumtlang (Bualpui), Teidu Phai (Saipum), Bulung Zau (Meidum) leh Zuksih (Bilkhawthlir) te an ni.