No.974/2020-2020

Tukin khan Social Welfare Minister Dr.K.Beichhua hovin Circuit House reception room-ah Mara Autonomous District Council-a MDC te leh Siaha District Covid-19 Food Security Consultative Committee ten inkawmhona hun an hmang.

Pu N.Zakhai, CEM, MADC leh Vice Chairman SDC-FSCC ni bawk chuan ni 3 (7th-9th,May) chhunga Siaha district an fan thu report a pe a. Pu KT.Rokhaw,MLA leh Vice-Chairman SDC-FSCC ni bawk chuan SDC-FSCC dinchhan leh hmalak tawhna te leh hmachhawp te chungchangah report a pe bawk.

Dr.K.Beichhua chuan SDC-FSCC hi din a ni tukah Aizawl lamah Vaimim chi leh Project cheng Rs.2500 lakhs SDC-FSCC hminga Ministry of Tribal Affairs hnena thehluh tul te buaipuiin ka kal nghal mai si a, mumal taka kan MDC te nena sawihona huntha hi kan la nei lo a ni. Mahse CEM leh EM 3 te kaltlanga SDC-FSCC in ngenna a siam angin; in bial theuhva Tam lo thleng mai thei chungchangah te in lo tlang-au nasa in; hma in lo la tih ka hmu a, kan lawm tak zet a ni, a ti.

Dr. Beichhua chuan SDC-FSCC thiltum 3 sawi nawnin:-

1) Covid-19 do nana sawrkarin dan leh dun a duan te tha taka zawm tura mipuite zirtir leh VLTF tin te thathlah hauh loh tura fuih leh chophur.

2) Covid-19 avanga Tam tla thei laka Maraland chhanchhuah.

3) Covid-19 avanga Ei leh Bar harsatna thleng thei laka kan inpuahchahna hmanga kan district economy leh Morale reformation puakchhuah.

SDC-FSCC hmalakna tawhna leh hmachhawp te chu MDC rual kalkhawm te chuan tha an tiin; kan hruaitu 3: Dr.K.Beichhua,Pu KT.Rokhaw leh Pu N.Zakhai, CEM te chungah rinna an nghah thu leh an hmalakna an thlawp tlat thu sawiin; SDC-FSCC hian cheng Rs.1/- pawh sum a neih loh avangin a bul tan nan MDC 28 te hian an hlawh atangin phal takin Rs.10,000/- theuh an thawh a, MLA 2 te pawhin an hlawh atangin Rs.20,000/- ve ve an thawh bawk . MLA te 2 leh MDC 28 hian hmalam hunah pawh a tul dan ang zela thawhbelh an inhuam thu an tarlang bawk.

Tukin chawhma vek khan Circuit House Multipurpose Hall-ah Vaimim chi quintal 80 chu MDC te hnenah Agriculture baseline survey report zulzuia semchhuah a ni a. MDC te hian an bial chhung theuh va Task force te kaltlangin an semchhuak ve leh dawn a ni.

Vawiin vek khan Minister chuan AH& Vety office, Siaha district ram chhunga Ranchaw leh Vaimim chin pawlhna hmun 15Ha a zau chu a hmunah a tlawh nghal bawk.