No.975/2020-2020

Vawiin khan Environment, Forests and Climate Change (EF&CC) Minister Pu TJ Lalnuntluanga hovin Principal Chief Conservator of Forests (PCCF) Conference Hall, Aizawlah Video Conference hmangin meeting pawimawh tak neih a ni a. Mizoram puma Forest Division 25-a Divisional Forests Officer (DFO) te leh officer pawimawh dangte an tel a ni.

Pu TJ Lalnuntluanga chuan COVID-19 avanga Mizoram leh khawvel hmun hrang hrangin harsatna a tawh avangin meeting tura kalkhawm leh thutkhawm a harsa a. He hrileng laka kan him theihna turin midangte hnaiha awm khawm lovin Video Conference kaltlanga meeting koh a nih thu leh hei hian hun leh tha, zin veivahna atana sawrkar sum leh pai tam tak luangral tur a veng tih a sawi. Minister chuan COVID-19 avangin ram pumah khauh taka inkhuahkhirhna kalpui a nih chhungin EF&CC hnuaia thawktu engemawzat chu hripui leng karah pawh chawl hlei thei lovin ramin a mamawh avangin an penchhuak tih meeting-ah hian a sawi a. Thawktute inpekna leh thahnemngaihna avanga lawmthu sawiin hun harsa tak kan tawh mek karah an mawhphurhna hneh taka an hlen chhuah avangin chhuanawm a tih thu Pu TJ Lalnuntluanga chuan a sawi a ni.

PCCF Dr ChM Rao pawhin officer kalkhawmte hmaah thu sawiin officer leh field staff -ten ram kang ven leh thelh te, forest nursery enkawl te, thing chi (seeds) lakkhawm te, dan lova ramhnuaia che thin ven kawngah hripui leng vanga inkharhkhip kalpui a nih lai pawha tha thlah lova an hna an hlenchhuak chu chhuanawm a tih thu a sawi.

Vawiin meeting-ah hian agenda pasarih sawiho a ni a. Chung zingah chuan Green India Mission (GIM) kalpui dan te, inkhuahkhirhna awm mek laia forest kaihhnawih dan bawhchhiatna ven hna leh dan lek kawh a nih dan te, Green Mizoram Programme hnuaia thingkung lian chi (tall seedlings) kui tiah chungchanga hmalakna te, reversed forest huamchhunga ram pass cancel chungchang te, CAMPA hnuaia DFO tin ten ruahmanna an siam te leh rawhling (bambusa bambos) tiak lakkhawm chungchanga DFO te hmalakna ngaihthlak a ni.

COVID-19 avanga khuahkhirhna khauh taka lek kawh a nih lai hun remchang lain dan lova thing zai, sapel, ram vak, lui kal leh ram hal ching mi engemawzat an awm a. Forest Officer leh field staff ten theihtawp chhuahin a ven hna an thawk a ni. Dan bawhchhetu an mante hi lei chawi tir an ni a; danin a khap sa pel ru te hremin an sa kahte man sak a ni a, thingzai leh dan loa silai kawl leh che lek man (seized) engemawzat lockdown hun chhung hian a awm tawh a ni.