2846/2022-2023
Aizawl the 29th November 2022 : Vawiin chawhma khan Health & Family Welfare Minister Dr. R.Lalthangliana chu Apollo School of Nursing 18th Capping and Lamp Lighting Ceremony-ah Khuallian niin, hun a hmanpui.

Khuallian Dr.R.Lalthangliana chuan nursing chu eizawnna zahawm tak leh ringtu te tan phei chuan Isua rawngbawlna chhawm nung zel tu te zing a mi an ni, a ti a. Damlo te tan damna leh hlimna tam tak thlen thei tu, inpekna thuk tak nena thawh ngai a ni a ti a. Nurse lukhum (cap) chuan Nurse te nunah hmun pawimawh tak a chang a, inpumkhatna a entir a, lamp lighting chuan mite tanpuitu, mite tana thlamuanna thlen tu, beiseina pe tu leh thiamna bik nei pho lanna a ni, a ti a. Sawrkar institution emaw mimal institution atanga Nurse pass chhuak te chu Mizoram pawnah leh ram dangah tumruhna nena thawk chhuak turin a fuih a, Mizo te ziaa bet tlawmngaihna leh mi harsa zawk te tanpui zel duhna thinglung chuan Mizo Nurse te chu khawi hmunah pawh fak leh doctor tam tak te pawhin damlo enkawl atan an duh bik thin a ni, a ti bawk a ni. Apollo School of Nursing atanga zir mek leh zirchhuak te chu inpekna tak tak nena thawk zel turin duhsakna a hlan bakah hlawhtling tur a teirei peihna leh an hna tha tak a an thawh theihnan an hriselna ngai pawimawh zel turin a fuih bawk a ni.

Vawiinah hian Nurse mi 36 hnenah Capping leh Lamp Lighting hi Dawrpui Multipurpose Hall-ah hmanpui an ni a. Apollo School of Nursing, Luangmual atang hian mi 403 ten Nurse an zirchhuak tawh a ni.