2845/2022-2023
Aizawl the 29th November 2022 : Vawiin khan Speaker Pu Larinliana Sailo chuan Supply Godown, Khawruhlian Supply Centre-ah a hawng.

Hawnna inkhawmah Speaker chuan thusawiin Mizoram sawrkarin ei leh bar a ngaipawimawh hle a, Mizote riltam tuihala an awm a phallo a, chuvangin hma nasa takin a la mek zel a; Food Civil Supplies & Consumer Affairs Department te hmalakna zara Godown hawn theih a nih chu lawmawm a ni a ti. Godown neih mai a tawk lo a, a thawktute pawhin rinawm taka mipui rawngbawl hna ani tih hria a enkawl hna tha taka thawk turin a chah a ni. He godown-in a chawm tur khua zawng zawng te chu duhsakna hlan nghalin khawtlang leh khua leh khua inkarah inlungrualna thar a thlen zel a beisei thu a sawi.

Speaker chuan tunlaiin Social Media-ah aia upa zahlohna, Kohhran leh NGO ngaihnepna thu tamtak hmuh tur a awm mek thu sawiin mipui kalkhawmte chu Social Media hmanna kawngah pawh fimkhur turin a chah a, mi tha, mi dik ram leh hnam hmangaihtu diktak mizoram in kan neih zel theihna tura tan la zui zel turin a chah nghal bawk a ni.

Food Civil Supplies & Consumer Affairs Minister Pu K. Lalrinliana pawhin thu sawiin, sawrkarin Mizoram hmun hrang hrangah Godown 21 sak hna a kalpui mek a, sak zawh vek thuai a beiseiawm ani a ti.Godown tha tak tak kan neih mek ah kan ram thar chhuah dah tur a awm mumal lo a, buhfai chu State pawn lam atanga lakluh anih thu sawiin Mizoram buhfai thar chhuah ngei dah anih thuai theihna turin Mizoram mipuite chu tan la turin a sawm a ni.

Khawruhlian Supply Godown hi a dung feet 58, avang feet 28 a zau niin buhfai Quintal 3000 a dah theih a, Godown bakah hian Quarters 2 leh Toilet Block te awm nghal in a vaiin cheng 203,57,805 seng niin, Babie Construction & Consultancy Services ten a sak hna an thawk a ni.

Vawiina Khawruhlian Supply Godown hawnna inkhawm hi Pi Ramdinliani, Secretary, Food Civil Supplies & Consumer Affairs (FCS&CA) chuan kaihruaiin, Dr Andrew H. Vanlaldika, Director(FCS&CA) chuan lawmthu sawiin hun a khar a ni.