2844/2022-2023

Sahmulphah thla ni 28, 2022: Khawvel pum huapa hmeichhiate laka hleilenna thleng ṭhin titawp tura hma lakna peng khat atana a puala ni bik hman ṭhin, International Day for Elimination of Violence Against Women chu vawiin khan Lawngtlai District One Stop Centre (OSC) huaihawtin OSC building, Lawngtlai College Vengah hman a ni.

He hun hi OSC District Centre Administrator Pi J. Lalremkimi  chuan kaihruaiin, kal khawmte lawmna thu a sawi a. Inchhungkhura hleilenna tuar hmeichhiate chhawmdawlna leh ṭanpuina kawnga OSC-in hma a lak dan leh Lawngtlai District-a OSC hma lakna report tlangpui a tar lang bawk.

He hunah hian Advocate Pi Sheila Laldinthari Hnialum chu resource person a ni a. Hmeichhiate'n inchhungkhura hleilenna (domestic violence) an tuar ṭhin tlangpui leh an tuar dan te tar langin, heti ang laka hmeichhia te humhimna/venhimna dan hrang hrang te, India Danpuiin hmeichhe laka hleilenna thlentirtute hremna a pek theih te leh hmeichhiate hamṭhatna chi hrang hrang a sawifiah a. Zawhna leh chhanna leh sawi hona hun hman a ni bawk.

United Nations General Assembly-in November ni 25 hi International Day for Elimination of Violence Against Women-a a puan angin kum tin hman ṭhin a ni a. Kumin hian thupuiah, "Unite:  Activism to End Violence against Women & Girls" tih hmangin, November ni 25 - December ni 10 thleng hmeichhiate laka hleilenna tibo tura hma lakna leh inzirtirna atan hman a ni dawn a ni.


Attachment

  • Loading attachment...