No.3081/2021-2022
Aizawl 22nd November 2021: Higher & Technical Education Minister Dr R Lalthangliana chuan vawiin khan ICFAI University, Mizoram Convocation vawi 9-na chu ICFAI University Campus, Durtlang North-ah khuallian niin a hmanpui. Kum 2020-2021 chhunga ICFAI University, Mizoram atanga Under Graduate leh Post Graduate zir chhuak mi 333 te hnenah degree hlan niin zirlai titha zual te hnenah gold leh silver medal sem chhuah a ni bawk.

Dr R.Lalthangliana chuan graduate tharte a lawmpui thu sawiin hripui leng karah hun harsa tak paltlanga hlawhtlinna chang tura rim taka beitu zirlai leh zirtirtute a fak a, hlawhtlinna chang zo ve ta lo te pawh beidawng loa nasa lehzuala tan la sauh sauh zawk turin a fuih. ICFAI University chuan Mizoram zirna hmasawnna turin a thawhhlawk a, a bik takin management education lamah an che tha hle, a ti a. Education-ah hian Sawrkar chauhin mipui mamawh a phuhru seng lo a, private leh pawl din institution tha tak tak lo piang chho zel hi a lawmawm a, heng mimal leh pawl din zirna in te hian an hlawkna tur piahlamah mi thiam chherchhuah chu dah pawimawh hmasa ber se a duh thu H&TE Minister chuan a sawi.

Zirlaite fuihin Dr R Lalthangliana chuan zirna hi degree neih emaw, hna thar hmuhah a tawp ngawt lo a, khawvel tak tak dai tura rahbi pawimawh an rap tan mek a ni tih hre tur te, hlawhtlinna an chan ang bawkin harsatna an tawh chang pawh a awm ngei dawn tih hriaa an thil tawn, an hmuh leh an hriat atanga thil thar zir zel tura inbuatsaih turin a chah a. Nun kawng dik zawh a, an taksa pawh enkawl tha tur leh an nunkawngah hlawhchamna an tawh chang pawh a zam loa, chonaah ngaia theihtawp chhuah chhunzawm zel turin Minister chuan zirlaite a fuih a ni.

ICFAI Chancellor Prof JP Ramappa chuan ICFAI University thil tum lian ber pakhat chu zirlai chhawrtlak chher chhuak a, Mizoram state chhung chauh ni lo India ram khawi hmunah pawh zahpuiawm lo tur zirlai hmantlak chherchhuak turin theihtawp a chhuah zel a ni, a ti. Mizoram Sawrkar leh ICFAI University, Mizoram te thawhdun tawhnaah lawmthu a sawi a, thawhpui chhunzawm zel atan a sawm bawk a ni.

He huna thusawitu dang ICFAI Vice Chancellor Prof RP Vadhera chuan harsatna tam tak paltlanga hlawhtlinna duhawm tak changtute a lawmpui thu a sawi a. An University chuan zirna tha zawk zirlaite hnena chhawpchhuah sak turin tan a la chhunzawm zel dawn, a ti.

Mizoram Legislative Assembly chuan kum 2006 khan ICFAI University Act a pass a. Hemi hnu hian he University hi a lo ding tan a. ICFAI Society sponsor mek niin UGC Act 1956, section 22 hnuaiah degree pek theihna a nei a ni. He University ah hian course hrang hrang MBA, M.Com, MA, MSW, MSc (Geog), BBA, BCA, BBA H&T, BA leh B.Com te a zir theih a ni.