Vawiin khan Health & Family Welfare Minister Dr. R.Lalthangliana chuan Govt. Chaltlang Higher Secondary School-ah  National Deworming Day hawngin, khuallian  a ni. He hun hi National Health Mission Director Dr. Eric Zomawia’n a kaihhruaina hun a hmangin, Dr. Lily Chhakchhuak, SPO (RCH) chuan National Deworming Day hman tan dan leh a pawimawhna zirlai naupang zingah sawifiahna hun a hmang bawk a ni.

Khuallian Dr. R.Lalthangliana chuan ei in uluk piah lamah chenna in fai leh thianghlim hrisel nan a pawimawh a, zirlaite chuan an zirlai tha taka an zir theihnan hriselna an ngai pawimawh hmasa ber tur a ni, a ti a. Nu leh pa ten engemaw chen mawhphurhna nei mah se, hriselna neih kawngah mahni bawk a tawpah a pawimawh ber a, zing thawh hma, ei in thianghlim, taksa enkawlna kawngah mahni hian tihtur kan nei theuh a ni, tiin a sawi a. Minister chuan Rulhut Hlo (Albendazole) hi taksaa thildang ti chhe thei tlem, damdawi man tlawm leh sawrkar pawhin a rin ngam a ni, a ti bawk a ni. Minister Dr. R.Lalthangliana chuan Rulhut pai avanga thisen tlakchhamna leh taksaa harsatna harng hrang awm theite venna atan National De-worming Day Mizoram-ah pawh hman a ni thei hi lawmawm a ti a, naupang leh tleirawlte hrisel zawkna atan leh an than lenna kawnga harsatna hrang hrang awm theite sutkianna atan hmalakna hi a pawimawh tak zet a, mipuite leh zirlai naupang zawng zawngte’n a hlawhtlin theihnan  he ni hi ngai pawimawh leh zual turin a chah bawk a ni.

Minister Dr. R.Lalthangliana hian Rulhut Hlo (Albendazole) damdawi zirlai naupangte hnenah ei tirna hun neiin, zirlaite’n he hun hi hlim takin an hmang a ni. School Education Department, Principal, Govt. Chaltlang Higher Secondary School, leh Women and Child Development Department aiawh te’n thu an sawi bawk a ni.

National Deworming Day hi Kum 2015 ah India ram state 11 ah hman tan a ni a, Kum 2016 atangin India ram pumah hman tan a ni a, kum khatah vawi hnih February leh August ah te hman thin a ni. National Deworming Day-ah hian naupang leh tleiawl Kum 1-19 inkar te hnenah a thlawnin Rulhut Hlo (Albendazole) eitir thin an ni a, Rulhut Hlo hi School leh Anganwadi Centre-ah te eitir thin an ni. Naupang leh tleiawl Kum 1-19 inkar ten kim taka rulhut hlo an ei thei nan Mop Up Day chu August Ni 16-ah neih leh tur a ni.