Khawvel huapa kum 1988 June ni 26 a hman tan, Mizoramah kum 2002a hman ve tan, Drugs Hmansual leh Tawlhruk Dona Ni, International Day Against Drugs Abuse and Illicit Trafficking chu vawiin khan Mizorama hmanna lian ber Vanapa Hallah department leh pawl hrang hrang panga ina an buatsaih chu Chief Minister Pu Lal Thanhawla’n hmanpuiin, khuallian a ni. Thupuiah Hriselna ruih chilh teh, ruihhlo niloin (Make Health your ‘New High’ in life, Not Drugs) tih hman a ni.

Chief Minister chuan drugs dona kawnga hmalatu zawng zawngte chungah lawmthu a sawi hmasa a. Mizoram chu drugs siamna hmunpui ‘Golden Triangle’ kan hnaih avanga drugs in a tihbuai nasat berte zing mi kan ni, a ti a. Kan ram buaina ang tho hian Punjab pawh ‘Golden Crescent’ an hnaih avanga drugs tihbuai nasat state an nih thu a sawi a. Chuvangin drugs vanga kan buai zel lohna turin ram leilung fa ten neitu rilru pu a, drugs dona beihpui a thara kan thlak angai a. Ram dangah hospitalah chauh drugs hman an phal, kan ramah hmansual theiha awlsam taka lei theiha a awm chungchangah sorkar thiam loh a ni tiin, hemi chungchangah indo kan puang a, na taka dan lekkawh a ni ang, a ti a, drugs Inspector-te hnathawh dan pawh enpui a tul a ni, a ti. Excise leh Police lam pawh an kut tihchak (empower) dan a awm em tih kan enchiang ang, a ti. Ram leh hnam hmangaih vanga a sur asa hnuaiah leh a thim avar pawh thlu lova, mahni hnaa ngaia drugs dotu tlawmngai pawl an awm hi an fakawm tak zet a ni, a ti a. Mahni hnaa tui hi kan ching tur a ni Pu Hawla chuan tiin, hei hi Pathian rawng kan bawlna a ni a, taimakna, dikna,rinawmna leh Pathian tihna nung nen kan kal tur a ni, a ti.

Chief Minister chuan ram leilung fa nilo, Zo hnahthlak thenkhatin drugs leh zu chhia in min run mek a, chung atanga an hlawhtlinna chuan min rawk leh mek bawk avangin, ram leilung fate kan harh a hun a, neitu rilru pu a tan kan lak hle angai a ni, a ti. Tun hnaiah drugs tawlhrutute zingah Mizo leh Zo hnahthlakte hming an mi mante zingah a lang ta fo mai chu Mizote tan a hmingchhiat thlak a, a pawi hle a ni, a ti a. He thil pawi tak tibelhchhahtu, khawvela drugs lama hming hliauna nei, Nigerian te kan Mizo nula ten an kawp thin chu a vanduaithlak hle a ni a ti. Kan zavai hian a chhelai siam thatu kan ni tih kan hriat nawn fo a tul a ni, a ti.

Chief Minister hian lehkhabu 'Ngawlveite Damna Kailawn' tih Darthakunga ziak a tlangzarh a. Pu Lal Thanhawla chuan ngawlvei kan tihte hi misual emaw kan ti thin a, tanpui ngai damlo, natna khirh tak vei an ni tih kan hriat a tha a ti a. Uluk tak leh thiam taka enkawl ngai an ni a ti. Nu le Pa thenkhatin an fa tena drugs an hmansual an zeppui thin chu a pawi a, a mawl thlak hle a ni, a ti. Drugs in a tihbuai tawh chu a man nghet a, talchhuah an harsat thin avangin dam hlenna chu Lal Isua Kristaah chauh a awm a ni, a ti.

Chief Minister hian thlalak intihsiakna ‘Say No to Drugs’ tih photo competition a ti tha te hnenah lawmman a sem bawk a ni.

Khualzahawm Social Welfare Minister of State Pu P.C.Lalthanliana chuan drugs hi kan kawngkaah a awm reng a ni tih hria a, a do dan leh inven dan kan thiam a tul a ni, a ti a. Drugs hmanah hian nawmna leh hlimna a awm emaw kan ti thin a, a phenah beidawnna leh hreawmna a awm a ni tiin, inhnaih tir loh hi fihlimna bul a ni, a ti.

Inkhawm Chairperson Pi M.Sathiyavathy, Principal Secretary, Social Welfare department in lawmna thu a sawi bawk a ni.

He ni denchhen hian tukin zing dar sarih khan New Secretariat Complexah Excise & Narcotics leh Police ten kum 2011 - 2013 chhunga drugs an man, court ina a chinfel tawh leh Pre trial disposal, tualchhung rate a Rs.22,79,00,478/- hu chu Chief Minister Pu Lal Thanhawla chuan meichhera depkaiin a hal a ni.