Vawiin chawhma dar 10:30 khan Government College, Saiha-ah “ Hriselna hi ruihchilh chhin teh, ruihhlo ni lovin “ tih thupui hmangin “ International Day Against Drug Abuse and Illicit Trafficking “ chu D.C. Saiha, Excise and Narcotics Department, D.I.C., M.H.I.P. M.CH.P. leh Y.M.A te bul tumin hlawhtling taka hman a ni.

He Ni hmanna inkhawm hi Dr Chawngkhuma Chawngthu Assistant Proffesor, Government Saiha College chuan a kaihruaia, Pu Lalhmingliana Fanai, Superintendent of Excise chuan thu sawiin Ruihhlo leh a kaihhnawih chi hrang hrang te lakah fimkhur turin zirlai te chu a chah a, zirlaite chu ruihhlo engthilah mah in hnamhnawih lo hram turin a ngen bawk. Dr Zirsangliana, Medical Officer, Civil Hospital, Saiha pawhin Addiction chungchang sawiin a that loh zia leh a hlauhawm zia a lem nena entirin zirtirna a pe a, Drugs Addict te chu chhungkua leh khawtlang tan mi hnawksak an ni tiin Addict te tan chhuah leh na chance hi za zelah panga chauh a awm thu sawiin Addict hi chhungkua a inthlahchhawn theih anih thu a sawi bakah Pu Beithlapalo Nohro, M.CH.P. Drop-in Centre Saiha ami chuan thu sawiin Drugs lakah thalaite chu inthiar fihlim tur leh hemi kawngah hian an thalai pui te hnena Awareness Campaign nei turin zirlai kalkhawmte chu a chah bawk a ni. He hunah hian M.CH.P. Saiha Drop-in Center a hnathawkte leh Saiha College zirlai thahnem tak an tel a, Pu Zothanmawia Khiangte S.D.C. Saiha chuan lawmthu sawina neiin  programme hi tih tawp a ni.

Hetiang programme vek hi vawiin chawhnu dar 1:30 ah Government Higher Secondary School, Saiha-ah neih leh a ni a, naktuk hian E.C.M. Higher Secondary School leh Don Bosco School Saiha-ah te neih chhunzawm leh a ni ang.

Attachment

  • Loading attachment...