Vawiin chawhma dar 11:00 khan Serchhip District Bawrhsap pisa-ah Serchhip Town Rate & Wages Control Committee chu Addl. DC Pu Lalsangliana hovin an thukhawm a, hnamdang Cement Mistiri te leh an helper te hlawh leh hnathawh dan kalphung bakah bawng sa rate chungchanga hmalak dan turte an sawi ho a ni.

Cement Mistiri leh helper-te hlawh zat tur Serchhip Town Rate & Wages Control Committee-in a lo tuk tawh chu hnamdangte hian zawm lovin ‘Theka’ lo chuan thawk duh an awm tawh meuh lova, hemi chungchanga hma la tur hian Sub Hqrs. YMA Serchhip chuan he committee hi a ngen a ni. Committee chuan hemi chungchang hi felfai leh awmze nei zawka kalpui a nih theih nan uluk taka zirchian phawt nise tiin a zirchiang tur committee a din nghal a, Pu Vanlalrova MCS, Sub Deputy Commissioner, Serchhip kaihhruaina hnuaiah member atan President, Serchhip District Consumer Association te, Secretary, Sub Hqrs YMA Serchhip leh President, Serchhip Joint Village Council te chu ruat nghal an ni.

He meeting-ah hian Chairman Pu Lalsangliana Addl. DC chuan YMA-in ram leh hnam tan dan chhungah, dan ang taka khawng leh khauh taka hma a la thin chu lawmawm a tih thu sawiin sawrkar official lam pawhin dik leh fel taka dan leh thupek kenkawh a nih theih nan theihtawpa hma an lak reng thu a sawi a, ILP Check Drive pawh thlatina neih tawh an tum thu a sawi a ni. Pu Sangte-a chuan sawrkar leh YMA-te thawhhona leh hmalakna tha tak avangin Serchhip District chhungah chuan hnam dangten permit fel lo neih an hlau em em a, sawrkar pawhin revenue a neih that phah a ni tiin hemi kawngah chuan Serchhip District chu district te ber ni mahse Aizawl leh Kolasib te dawttu kan ni tih a sawi bawk.

Tun dinhmunah hian Serchhip Town Rate & Wages Control Committee-in hnamdang cement mistiri leh an helper te tana hlawh zat tur a bituk hman lai mek chu ni khatah Misitiri tan Rs. 350/- aia sang lo leh Helper tan Rs. 200/- a ni.

Attachment

  • Loading attachment...