221/2023-2024

Mizo Academy of Letters (MAL) chuan  kum 2022 chhunga Mizo tawng Lehkhabu chhuak tha ber atan Dr. Zohmangaihi ziak  'Daidanna Bang Phena Thuruk'  chu a thlang a, vawiin khan 'Book of the Year, 2022' chawimawina  hi a dawngtu hnênah MAL chuan a hlan. MAL din champha puala inkhawm, Central YMA Hall-a buatsaihah hian khuallian Pu R.Lalzirliana, Art & Culture Minister chuan BoY dawngtu hnênah hian chawimawina thuchei (citation) leh pawisa fai Rs. 10000 chu Dr. Zohmangaihi hnênah hian a hlan a ni.

MAL President, Prof. RL Thanmawia kaihhruai he inkhawmah hian, Book of the Year thlangtu Committee Secretary, Dr. C.Lalawmpuia Vanchiau-in a tarlan dan chuan, kum 2022 chhung khan lehkhabu 203 a chhuak a, hêng zîngah hian hmun hmuha ṭhena hmun khat aia tam chu Christian Literature a ni. Lehkhabu khâwn khawm zîngah hian bu 5 hi Myanmar rama chhut leh chhuah a ni a, Tripura lam chhuak 2 a awm bawk. Hêng lehkhabu atang hian lehkhabu 36 ah insawrbing a ni a, chuta tang chuan top 20 thlan a ni a, chumi hnuah top 10 thlan leh niin chuta tang chuan Top 3  thlan leh a ni a, tichuan a tawpah Dr. Zohmangaihi ziak, 'Daidanna Bang Phena Thuruk' tih chu a thlang ta a ni.

MAL din champha leh Book of the Year lâwmman hlan inkhawmah hian MAL member ziak lehkhabu 4 chu khuallian Pu R.Lalzirliana hian a tlângzarh a, Mizo tawng humhalh leh tihhmasawn chu hnam tana thil pawimawh tak a nih thu a sawi a ni.

He inkhawmah hian Mizoram district hrang hrang leh Myanmar lam atanga MAL member thahnem tak  an tel a ni.