222/2023-2024

Champhai, the 26th April, 2023: Champhai Urban Primary Health Centre (UPHC), Champhai Vengthar ami chu vawiin chawhnu dar 1 khan Health & Family Welfare Minister Dr. R. Lalthangliana'n khuallian niin a hawng.

Khuallian Dr. R.Lalthangliana chuan hriselna kawnga Champhai khawpui mamawhna phuhru tura Urban PHC hawn a ni chu lawmawm a tih thu sawiin, hmunhma nghet neih hmaa kalpuina tur hmunhma phal taka hmantirtu Education Department chungah lawmthu a sawi a; hmunhma nghet building thar nena UPHC Champhai kalpui a nih theih nan hmalak zel a ni, a ti a. Hriselna chu thil pawimawh hmasa leh thil dangte innghahna pawimawh tak a nih thu sawiin, hriselna hloh chu thil dang hloh aia pawi leh nghawng nei nasa zawk a ni, a ti a. Hriselna kawnga hmalaknaah tun aia nasa zawka tanlak a pawimawh thu leh, Health Department chauh nilo line department, VC leh NGO te nena tangruala hmalak tlan a pawimawh thu a sawi bawk.

Hripui leng avanga hun engemawchen khaihlak a nih laiin mipui mamawh hriselna kawnga tulte chhawpchhuah kawngah tanlak a nih thu sawiin, Mizorama Urban PHC 9-na tur Champhai Urban Primary Health Centre hawn chuan Sawrkarin mipuite hriselna a dah pawimawh hmasak zia a lantir a ni, a ti a. Ropui tak leh changtlung taka bultan ni rih lo mahse, cheibawl leh tihchangtlun kawngah theihtawp chhuah zel tum a ni, a ti bawk.

He hun hmanpuitu Law & Judicial Minister Pu T.J. Lalnuntluanga, Champhai South bialtu MLA chuan Urban PHC tluang taka kalpui a nih theih nana Health Department leh Education Department-te, thawktute leh khawtlang hruaitute inpekna fakawm a ti a. Tihchangtlun kawnga hmalak tawh dante tarlangin, theihtawp chhuaha tanrual zel a pawimawh thu a sawi a. Sawkarin hmasawnna ruhrel hrang hrangte a chhawpchhuah mek zel thu leh Champhaiah pawh theihtawp chhuaha hmasawnna ruhrelte siam zel a nih thu a sawi a. Hmasawnna ni pawimawh tak chuan mipuiteah beiseina eng pe se a duh thu a sawi bawk.

Thusawitu dang H&FW Board Vice Chairman Dr. ZR. Thiamsanga, Champhai North bialtu MLA chuan Champhai Urban PHC hawn ni chu hriselna rahbi kawnga ni chhinchhiah tlak tak leh, mipui tana chhenfakawm tak tur a nih thu a sawi a. Niti Ayog health assessment-ah small state zinga titha berah Mizoram thlan a nih thu sawiin, health sub-centre te tihchangtlun niin, a awm lohnaahte pawh health clinic-te din a ni, a ti bawk.

He hun hi Dr. PC Lalramliana, Principal Director, H&FW Department chuan a kaihruai a. Dr. Eric Zomawia, Mission Director, National Health Mission (NHM) chuan technical report a pe a. Dr. PC Lalhmingliana, CMO Champhaiin lawmthu sawiin hun hman a khar a ni.

Khawpuia cheng harsa zualte pan theih turin India ram khawpui dangte ang lovin tlangram bik tan In sing 30,000 chin tan Urban PHC pakhat zel din theih a ni a. Champhai Urban PHC din tur hian kum 2020-2021 ah khan Sawrkar laipuiah din phalna dil a ni a. April 2021 atang khan Education Department Building, Champhai Vengthar luah hawha bultan niin, tun dinhmunah hian thawktu 11; Doctor - 1, Staff Nurse - 3, Health Worker - 2, Group D - 2, Pharmacist - 1, Lab. Tech -1, Accounts Clerk - 1 an awm mek a ni.

Champhai Urban PHC-ah hian khum 6 awm mekin, OPD, Laboratory, Immunization, NCD leh program hrang hrangte kalpui a ni a. Chhungkua 6881, mihring 34333 bakah Urban ASHA 7, Sub-Centre 6, Mahila Arogya Samity 6 leh Anganwadi Centre 44 te a huam mek a ni.

He huna tarlan a nih dan chuan din a nih atanga vawiin ni thlengin Champhai Urban PHC ah hian OPD case 5430, damlo admit 23, Lab Test 2367, Outreach tum 11 atangin mi 704 te hriselna enfiah a ni a, Specialist tum 14 tlawh atangin damlo 454 te enkawl an ni a. Hri danna pek mi 155 an awm tawh bawk.

Program hman zawh hnu hian Health Minister hian Champhai Venglaia Health & Wellness Centre tlawhin, thuamthat leh tih changtlung kawnga hmalak tulte a enfiah a ni.

Vawiin chawhma khan Health Minister hian Khawzawl District Hospital tlawhin, Sawrkar hmalakna kal mek a hmunah a thlir kual nghal a. CMO Building sak zawh tep leh, District Hospital Khawzawl Building sakna tur hmunhma a en a. A tahtawlin District Hospital Khawzawl chu mithiam zawkte leh hmanraw changkang zawk hmanga thuam that zel tum a nih thu a sawi bawk.