1691/2022-2023
Aizawl, the 24th August, 2022 : Tukin zing dar 7:30 khan Sialhawk khuain an thar chhuah lakhuihthei (pineapple) kilogram 300 chu Dubai, United Arab Emirates (UAE) aleh Bahrain-a hralh turin thawn chhuah leh a ni.

Sialhawk lakhuihthei hi Fair Exports (I) pvt. Ltd. te bawkin an la leh ang a. Tun tumah hi chuan thlawhna a phurh man zawng zawng hi Fair Exports te hian an tum vek bakah Mumbai ah kg khat cheng sawmthumin an lei dawn a ni. Indawrna a kal tluan chuan ni hnih thum hnu velah Bahrain leh Doha ah te thawn leh theih beisei a ni.

Sialhawk khua-a lakhuihthei chingtute hian kumin hian lakhuihthei quintal 5000 vel an hralh chhuak tawh a. Mizoram chhung bakah Assam leh India ram pawnah te an thawn chhuak a, kuminah quintal 10000 vel thar chhuak turin an beisei a ni.

Sialhawk Pineapple Grower Society hian an lakhuihthei hralhna tiawlsam turin APEDA (Agricultural and Processed Food Products Export Development Authority) kal tlangin Central Transport Subsidy an dil mek a. Tun dinhmunah chhanna engmah an la dawng rih lo.

Sialhawk VC Vice President Pu J.Rampanmawia sawi danin, kan thenawm state Assam leh Tripura te chuan an thlai thar te ram danga thawnna tur thlawhtheihna phurh man hi Central sawrkarin APEDA kaltlangin a tumsak vek thin a. Chutiang anga transport subsidy kan hmuh ve theih hunah chuan awlsam leh hlawk zawkin Sialhawk lakhuihthei bakah Mizoram thlai thar dangte pawh ram danga thawn chhuah theih a beiseiawm hle niin a sawi.

Pu J.Rampanmawia chuan Sialhawk atanga India ram pawn Dubai thlenga Sialhawk thlai thar te hralh a nih theihna tura sum leh pai senso ngai zawng zawng chu Tuichang Bialtu MLA, Deputy Chief Minister Pu Tawnluian a tum vek a ni tih a sawi a. Mizoram tan mellung pawimawh tak an phun theih phah ta niin a sawi.

Deputy Chief Minister Pu Tawnluia hmalaknain tunah hian Sialhawk lakhuihthei hi a tui sawr turin Chhingchhip a MIFCO hmunah pek tura hmalak mek a ni.